Tags-Ishq

sar-gashtagi-e-marhala-e-shauq meñ ai ishq
paḌtā hai na.ī vaz.a se har gaam hamārā

ham ne to is ishq meñ yaaro khīñche haiñ āzār bahut
tum kuchh us kī baat karo hai jis se tum ko pyaar bahut

maqām-e-hosh se guzrā makāñ se lā-makāñ pahuñchā
tumhāre ishq meñ dīvāna-e-manzil kahāñ pahuñchā

usī ne ishq ban kar do-jahāñ ko phūñk Daalā hai
vo sho.ala jo tirī nazroñ se dil ke darmiyāñ pahuñchā

tum apnī justujū meñ ye mirā shauq-e-talab dekho
tumhāre ishq meñ luT kar bhī tum tak jān-e-jāñ pahuñchā

phir aaj ishq 'musavvir' huā hai ḳhāk-basar
phir ehtimām-e-urūj-e-salīb-o-dār karo

husn kab ishq kā mamnūn-e-vafā hotā hai
laakh parvāna mare sham.a pe kyā hotā hai

ishq-e-āvāra-o-badnām ne izzat rakh lī
ham se be-ghar bhī kiyā karte haiñ kūcha-gardī

hai sañg par barāt-e-ma.āsh-e-junūn-e-ishq
ya.anī hunūz minnat-e-tiflāñ uThā.iye

āḳhir ko rāh-e-ishq meñ ham sar ke bal ga.e
mushkil meñ haath paañv hamāre nikal ga.e

vo ajab ghaḌī thī maiñ jis ghaḌī liyā dars nusḳha-e-ishq kā
ki kitāb aql kī taaq par juuñ dharī thī tyuuñ hī dharī rahī

is uljhan ko suljhāne kī kaun sī hai tadbīr likho
ishq agar hai jurm to mujrim rāñjhā hai yā hiir likho

ishq meñ ā.eñgī vo bhī sā.ateñ
kaam niklegā dil-e-nākām se

ishq baalā hai husn-e-sarkash se
sāya-e-sarv bāl-e-fāḳhta hai

banūñ maiñ tere liye vajah-e-lutf-e-lāfānī
ziyā-e-ishq kī sūrat dil-o-jigar meñ rahūñ

patthar se hoñ dil yak-nigah-e-garm meñ paanī
hai ishq se ījād hunar shīshagarī kā

abhī javānī hai mai-kade par abhī to bādal bhī hai ghanerā
abhī to zinda hai husn saaqī abhī salāmat hai ishq merā

lashkar-e-ishq aa paḌā hai mulk-e-dil par TuuT TuuT
kaan meñ aatī nahīñ hai juz sadā-e-lūT-lūT

ishq udhar aql idhar dhun meñ chale haiñ terī
rasta ab dekhiye donoñ meñ kaThin kis kā hai