Tags-Ishq

ishq kā khel ba-har-hāl gavārā hotā
tum na hote to koī aur hamārā hotā

us ko maiñ hijr kā unvān banā kar paḌhtā
nāma-e-ishq meñ halkā sā ishāra hotā

aañkh bhar ishq aur badan bhar chaah
shukr lab bhar gila zabāñ bhar thā

pahlī sī lazzateñ nahīñ ab dard-e-ishq meñ
kyuuñ dil ko maiñ ne zulm kā ḳhūgar banā diyā

sab maayā hai, sab Dhaltī phirtī chhāyā hai
is ishq meñ ham ne jo khoyā jo paayā hai

kyā ajab kār-e-tahayyur hai supurd-e-nār-e-ishq
ghar meñ jo thā bach gayā aur jo nahīñ thā jal gayā

marīz-e-ishq hone tak sunā hai
adhūrī zaat thā kāmil nahīñ thā

parda-dārī kartī hai dar-parda lailā ishq kī
jazba-e-dil qais kā hai parda-e-mahmil nahīñ

haq meñ ab āshiq ke dekheñ faisla hotā hai kyā
ishq kā da.avā huzūr-e-husn to bātil nahīñ

āh-o-fuġhān-o-girya-o-andoh o dard o daaġh
jo jins-e-ishq hai vo mire paas sab hai ab

thā abas tark-e-ta.alluq kā irāda yuuñ bhī
ishq zinda nahīñ rahtā hai ziyāda yuuñ bhī

vasl kī rut ho ki furqat kī fazā mujh se hai
ishq kī raah meñ sab achchhā burā mujh se hai

ġhurūr-e-ishq ḳhudī aur ābrū-e-vafā
inheñ gañvā ke bahut kuchh bachā liyā maiñ ne

shah chaal ho rahā huuñ sanam tere ishq meñ
tū ne dikhā ke ruḳh mirī baazī hī maat kī

jis jagah marnā thā mujh ko maiñ vahāñ jiitā rahā
ishq meñ har kaam be-mauqa-mahal maiñ ne kiyā

hazār shukr ki ham maslahat-shanās na the
ki ham ne jis se kiyā ishq vālehāna kiyā

naġhma-o-ishq se haiñ sub.ha-o-zunnār mile
ek āvāz pe do saaz ke haiñ taar mile

dard-o-rañj-o-alam o hasrat-o-dāġh o ġham-o-rashk
mujh ko kyā kyā na tire ishq meñ āzār mile

jām-e-ishq pī chuke zindagī bhī jī chuke
ab 'hilāl' ghar chalo ab to shaam ho ga.ī

be-dīn hue īmān diyā ham ishq meñ sab kuchh kho baiThe
aur jin ko samajhte the apnā vo aur kisī ke ho baiThe