Tags-Ishq

banda-e-ishq hai tirā 'beḳhud'
tujh ko yārab gavāh kartā huuñ

havāoñ meñ diloñ kā kārvāñ hai
muqaddas ishq jab se mehrbāñ hai

ishq-e-jān-e-jahāñ nasīb huā
ik zamāna mirā raqīb huā

paas ādāb-e-husn-e-yār rahā
ishq mere liye adiib huā

ishq kī apnī hī rasmeñ haiñ dost kī ḳhātir hāthoñ meñ
jītne vaale patte bhī hoñ phir bhī harne lagte haiñ

chhoḌ deñ dair-o-haram kufr aur islām ke log
ka.aba-e-dil meñ jo dekheñ mire but-ḳhāna-e-ishq

ai ishq ye sab duniyā vaale be-kār kī bāteñ karte haiñ
paa.el ke ġhamoñ kā ilm nahīñ jhankār kī bāteñ karte haiñ

kaisī kashish hai ishq ke TuuTe mazār meñ
mela lagā huā hai hamāre dayār meñ

dil ko samjhāo zarā ishq meñ kyā rakkhā hai
kis liye aap ko dīvāna banā rakkhā hai

ātish-e-ishq se allāh bachā.e sab ko
isī sho.ale ne zamāne ko jalā rakkhā hai

aziiz the hamīñ nau-vāridān-e-kūcha-e-ishq
so pīchhe haTte ga.e rāsta diye ga.e ham

dā.era-vār thā safar ishq-e-junūñ-sifāt kā
hijr-o-visāl kuchh na thā mujh ko yaqīn aa gayā

sharbat-e-ḳhūn-e-jigar kā maza āshiq paave
lazzat-e-ishq-e-jigar-ḳhār kuuñ kui kyā jaane

mashrab-e-ishq meñ haiñ shaiḳh-o-barhaman yaksāñ
rishta-e-sub.ha-o-zunnār kuuñ kui kyā jaane

dil nahīñ hai vo nahīñ hai ishq kā jis meñ guzar
vo bhī koī aañkh hai jis aañkh meñ hasrat nahīñ

bach jaa.e musht-bhar sahī dafnāne ke liye
mauj-e-balā-e-ishq meñ Dūbegī kitnī ḳhaak

ishq kī tund-ḳhezī ke auqāt āḳhir hue
ai mubāraz-talab zindagī

jitnā junūñ hai jeb meñ bāhar nikāliye
bāzār hai ye ishq kā ḳharcha kareñ huzūr

vaah re aalam kamāl-e-ishq kā
merī un kī ek sūrat ho ga.ī

ātish-e-ishq se bachiye ki yahāñ ham ne bhī
mom kī tarah se patthar ko pighalte dekhā