Tags-Izhar

ye kyā qātil haiñ, pahle qatl karte haiñ mohabbat kā
phir us ke ba.ad iz.hār-e-pashemānī bhī karte haiñ

tujh se himmat to paḌī ishq ko kuchh kahne kī
ḳhair shikva na sahī shukr kā iz.hār to hai

ġharaz thī iz.hār-e-mudda.ā se sitam ko kiyā ho ga.e jo shākī
vo dekhte hī bigaḌ na jaa.eñ bulāne ab nāma-bar ko chaliye

nahīñ vāqif hai dil īsār se jab
'atā' iz.hār-e-ulfat kis liye hai

mohtasiboñ kī ḳhātir bhī apne iz.hār meñ kuchh pahlū
rakh to liye the ham ne ab chāhe an-chāhe rakkhe the

ġham aur ḳhushī nahīñ mauqūf rone hañsne par
aur in havāloñ se iz.hār mo'tabar bhī nahīñ

dil diyā jis ko vo huā ġhāfil
jurm-e-iz.hār kī sazā kyā hai

allāh-re o dushman-e-iz.hār-e-mohabbat
vo dard diyā hai jo kisī se na davā ho

ik lafz jis ke ijz meñ iz.hār-e-dam-ba-ḳhud
ik naam merī aañkh kā taara nahīñ huā

asrār-e-mohabbat kā iz.hār hai nā-mumkin
TuuTā hai na TūTegā qufl-e-dar-e-ḳhāmoshī

aa.ina zāhir to kar saktā hai ḳhadd-o-ḳhāl ko
aa.ina ehsās kā iz.hār kar saktā nahīñ

āñsuoñ kā aur matlab kuchh nahīñ
muḳhtasar sī sūrat-e-iz.hār hai

vo taptī dhuup se jab sāya-e-dīvār tak aa.e
to jaatī dhuup ke manzar lab-e-iz.hār tak aa.e

sach ke iz.hār kā sheroñ ko bahāna jaanā
bach rahe yuuñ ki zamāne ne fasāna jaanā

qadr tāzīm kashish shauq mohabbat iz.hār
rokiye dil ko na jaane ye kahāñ tak pahuñche

jis se bachtā thā maiñ dam-e-iz.hār
vahī pahlū bayān se niklā

samajhne vaale yaqīnan samajh hī lete haiñ
hamārā dard jo iz.hār meñ nahīñ aatā

iz.hār-e-ġham kiyā to ye us ne diyā javāb
chehra gavāhī detā hai jhūTe gavāh kā

jaan par aa banī hamdam mirī ḳhāmoshī se
baat kuchh ban nahīñ aatī hai ab iz.hār baġhair

shāyad kisī mahrūmī kā iz.hār huā hai
mazmūn mohabbat ke jo sheroñ meñ dhar aa.e