Tags-Izhar

kuchh is tarah nigāh se iz.hār kar ga.e
jaise vo mujh ko vāqif-e-asrār kar ga.e

dāman-e-iz.hār meñ jazbe samā sakte haiñ nahīñ
baat phir bhī baat hai ik baar kah ke dekhnā

ye kyā kiyā ki pyaar kā iz.hār kar diyā
maiñ apnī is shikast pe hairān thā bahut

lamhoñ kī bāz-gasht meñ sadiyoñ kī guuñj thī
aur āgahī kā mujrim-e-iz.hār maiñ hī thā

jurm-e-iz.hār-e-tamannā aañkh ke sar aa gayā
chor jo dil meñ chhupā thā aaj bāhar aa gayā

vo rahm-o-karam hai bil-āḳhir mujh ko to 'suhail' is par hai yaqīñ
bas us kī ināyat kā yāroñ iz.hār ye pahlī bārish hai

iz.hār meñ quvvat hai to mil jā.egā mauzūa
sūkhā nahīñ paḌtā hai to barsāt pe ronā

mujhe dīvāna kar detī hai apnī maut kī shoḳhī
koī mujh meñ rag-e-iz.hār kī sūrat phaḌaktā hai

dar-haqīqat ḳhāmushī me.arāj hai guftār kī
is se behtar koī bhī sūrat nahīñ iz.hār kī

ye iz.hār-e-sāda hai jazbāt kā
kamāl-e-hunar kī numā.ish nahīñ

ab husn meñ paidā haiñ pazīrā.ī ke āsār
tum ishq meñ kuchh jur.at-e-iz.hār to laao

maiñ iz.hār karūñ ḳhud kā
tū dekh ḳhud ko zarā

umr bhar kāvish-e-iz.hār ne sone na diyā
harf-e-nā-gufta ke āzār ne sone na diyā

ki pahle kī iz.hār ḳhud us ne ulfat
na aayā to sau baar ghar se bulāyā

sab hī kuchh us se na kahnā thā jo tere dil meñ thā
shiddat-e-iz.hār meñ tū ne 'farāsat' kyā kiyā

hoñT kuchh kahne ko betāb haiñ kab se lekin
us kī aadat hai vo iz.hār nahīñ kar saktā

zamānoñ ko milā hai soz-e-iz.hār
vo saa.at jab ḳhamoshī bol uThī hai

terā ġham thā aur tujh hī se bayāñ kartā thā maiñ
kaun sā ġham qābil-e-iz.hār hai tere baġhair

tū mire pyaar meñ da.ave to bahut kartā hai
barmalā pyaar kā iz.hār nahīñ kar saktā

milnā thā husn-e-bayāñ ko ek iz.hār-e-ḳhulūs
lafz-o-ma.anī ḳhud-baḳhud urdu zabāñ tak aa ga.e