Tags-Izhar

husn-e-be-parvā ko ḳhud-bīn o ḳhud-ārā kar diyā
kyā kiyā maiñ ne ki iz.hār-e-tamannā kar diyā

yak baar bar na aa.e us se ummīd dil kī
iz.hār karte kab tak yuuñ baar baar ḳhvāhish

nahīñ yaarā hai mujh ko rāz-e-dil iz.hār karne kā
atā tāqat zabāñ ko ab barā-e-guftugū kar de

chup rah kar iz.hār kiyā hai kah sakte to 'ānas'
ek alāhida tarz-e-suḳhan kā tujh ko baanī kahte

māne-e-iz.hār tum ko hai hayā, ham ko adab
kuchh tumhāre dil ke andar kuchh hamāre dil meñ hai

iz.hār-e-hāl sun ke hamārā kabhī kabhī
vo bhī hue haiñ anjuman-ārā kabhī kabhī

jhūlnā daar pe is ahd meñ āsāñ hai magar
marhala saḳht bahut jur.at-e-iz.hār kā hai

mas.ala ye nahīñ ki ishq huā hai ham ko
mas.ala ye hai ki iz.hār kiyā jaanā hai

hamāre gumbadoñ kī guuñj kā chehrā nahīñ to kyā
jo tujh se kah nahīñ sakte pas-e-iz.hār hai yuuñ bhī

dil pe kuchh aur guzartī hai magar kyā kiije
lafz kuchh aur hī iz.hār kiye jaate haiñ

savāloñ kā tūmār mub.ham zabāñ meñ
magar rāz-e-dil kā na iz.hār karnā

phir koī kuchh na bol sakā kuchh na kar sakā
us be-zabāñ kī jur.at-e-iz.hār dekh kar

kuchh aaise sher haiñ yaaro jo ham nahīñ kahte
har ek baat kā iz.hār kyā zarūrī hai

hazār rañg meñ mumkin hai dard kā iz.hār
tire firāq meñ marnā hī kyā zarūrī hai

maiñ sho.ala-e-iz.hār huuñ kotāh huuñ qad tak
vus.at mirī dekho to hai dīvār-e-abad tak

iz.hār-e-jān-e-pāk hai jism-e-kasīf se
be-pardagī hijāb hai zulmat hī nuur hai

shiddat-e-iz.hār-e-mazmūñ se hai ghabrā.ī huī
terī be-unvāñ kahānī lab pe sharmā.ī huī

iz.hār-e-ġham-e-dil karnā to 'ehsās' ba-har-hāl āsāñ hai
ashkoñ kī faqat do būñdoñ kā āñkhoñ se nikalnā mushkil kyā

iz.hār karūñ jis se maiñ ahvāl ko apne
ahvāl-e-tabāh us kā rahe yaar hamesha

ḳhāmosh bhī rah jaa.e aur iz.hār bhī kar de
tasvīr vo hāziq hai jo bīmār bhī kar de