Tags-Izhar

us shoḳh se kyā kījiye iz.hār-e-tamannā
ye log koī sunte haiñ guftār-e-tamannā

jaib o garebāñ TukḌe TukḌe dāman ko bhī taar kiyā
kaise kaise ham ne apnī vahshat kā iz.hār kiyā

iz.hār kījiye ki zarā karb kam to ho
ai dosto dukhoñ ko diloñ meñ na pāliye

zabt kī had se guzar kar ḳhaar to honā hī thā
shiddat-e-ġham kā magar iz.hār to honā hī thā

na kaam aayā jahāñ arz-e-hunar bhī
lab-e-iz.hār sharminda hue haiñ

sar-e-sharh-o-iz.hār jaane kaisī havā chalī hai
ki bikhar gayā hai suḳhan suḳhan intiḳhāb sā kuchh

khulā hai bāb-e-qafas to is par ḳhushī kā iz.hār kar rahe ho
milī hai jis ko rihā.ī mahrūm-e-bāl-o-par hai sitam to ye hai

kab is zamīñ kī samt samundar palaT kar aa.e
iz.hār-e-avvalīñ kā vo manzar palaT kar aa.e

kyuuñ na 'tanvīr' phir iz.hār kī jur.at kiije
ḳhāmushī bhī to yahāñ bā.is-e-rusvā.ī hai

ai rūh-e-zindagī
ai ḳhudā kī quvvat-e-iz.hār

zabāñ ko apnī gunahgār karne vaalā huuñ
ḳhamosh rah ke hī iz.hār karne vaalā huuñ

chhupānī chāhiye jo baat mujh ko duniyā se
usī kā aaj maiñ iz.hār karne vaalā huuñ

ġham kā iz.hār nahīñ ashk-e-nadāmat jaano
qatra-e-āb agar dīda-e-tar se utrā

pahuñche na yuuñ hī manzil-e-iz.hār-e-zāt tak
taht-e-shu.ūr ik safar-e-lā-shu.ūr thā

bekār us ke sāmne izhār-e-zauq-o-shauq
nādāñ shai-e-latīf se jo āshnā nahīñ

insāñ vo kyā ki jis se ho sarzad ḳhatā nahīñ
iz.hār-e-dard-e-dil pe ye ġhussa ravā nahīñ

kaifiyat iz.hār-e-soz-e-dil kī kuchh aisī huī
aate aate lab talak alfāz mub.ham ho ga.e

māntā huuñ maiñ ne tere zabt ko chheḌā magar
raah meñ yuuñ dekh kar izhār-e-be-zārī na kar

nashāt-e-iz.hār par agarche ravā nahīñ e'tibār karnā
magar ye sach hai ki aadmī kā surāġh miltā hai guftugū se

kyā pūchhte ho maqsad-e-iz.hār-e-ārzū
sharh-e-vafā pe naqd-o-nazar chāhtā huuñ maiñ