Tags-Izhar

butoñ se sitam par bhī iz.hār-e-ulfat
'rashīd' aap meñ ādmiyat nahīñ hai

baat koī iz.hār-e-haqīqat meñ bhī uThā rakhnā nahīñ zālim
'shauq' kabhī ash.ār meñ jaise hotā nahīñ ilhām munāsib

saare alfāz ġhazal jaise the guftār ke vaqt
rañg-e-iz.hār-e-tamannā bhī ġhazal jaisā thā

mujh se nafrat hai agar us ko to iz.hār kare
kab maiñ kahtā huuñ mujhe pyaar hī kartā jaa.e

sukūt-e-nāz ne iz.hār kar diyā jis kā
vo ek baat thī pairāya-e-bayāñ se alag

haq baat hī kaheñge sar-e-dār dekhnā
ahl-e-qalam kī jur.at-e-iz.hār dekhnā

rū-ba-rū un ke kahāñ thī fursat-e-iz.hār-e-ġham
lab ko ik jumbish barā.e naam ho kar rah ga.ī

aur bhī un ne 'bayāñ' zulm kuchh afzūd kiyā
kiyā us shoḳh se tiiñ ishq kā iz.hār abas

mirā mafhūm āsānī se khul jaa.e jahāñ par
maiñ apnā lahja-e-izhār saada chāhtā huuñ

mere andar use khone kī tamannā kyuuñ hai
jis ke milne se mirī zaat ko iz.hār mile

sher sunñe se ziyāda ḳhud sunāne ke liye
nafḳh kī hālat meñ haiñ betābi-e-iz.hār hai

betābī-e-iz.hār ne yuuñ ḳhaak kiyā hai
duzdīda-nigāhī ne mujhe chaak kiyā hai

chalā to huuñ pa.e iz.hār-e-dard-e-dil dekhūñ
huzūr-e-yār majāl-e-bayāñ rahe na rahe

lab par jo mire āh-e-ġham-ālūd nahīñ hai
iz.hār-e-mohabbat mujhe maqsūd nahīñ hai

shakl-e-ādam ke sivā aur na bhāyā naqsha
saare aalam meñ ye iz.hār hai allāh allāh

shah-e-'mardāñ' na koī aur na ḳhādim na safī
shakl-e-ahmad kā ye iz.hār hai allāh allāh

qissa qarnoñ meñ na tai hotā vo dam-bhar meñ huā
fazl murshid kā ye iz.hār hai allāh allāh

ehsās us kā jāma-e-iz.hār māñge hai
uftād aa paḌī hai ye 'arshad' kī jaan par

baat āsān farāvāni-e-ġham ne kar dī
ab mujhe shikva-e-nā-kāmi-e-iz.hār nahīñ

tujh se kis tarah maiñ iz.hār-e-tamannā kartā
lafz sūjhā to ma.ānī ne baġhāvat kar dī