Tags-Izhar

harf-e-matlab zabāñ pe kyuuñ aa.e
ye to iz.hār-e-ārzū hogā

maiñ bhī kuchh apne karb kā iz.hār kar sakūñ
mujh ko bhī kuchh salīqa-e-arz-e-hunar mile

sochte sochte dhuñdlā ga.e yādoñ ke nuqūsh
fikr ko mere na ab tak lab-e-iz.hār milā

ḳhāmushī merī ye kahtī hai 'jalīl'
dard-e-dil iz.hār ke qābil nahīñ

rāz-e-ishq iz.hār ke qābil nahīñ
jurm ye iqrār ke qābil nahīñ

parvarda-e-shab ko hai kahāñ jur.at-e-iz.hār
Darte haiñ ki shānoñ se kahīñ sar na utar jaa.eñ

mere andar use khone kī tamannā kyuuñ hai
jis ke milne se mirī zaat ko iz.hār mile

lazzat-shanās-e-ġham ko hai iz.hār-e-ġham harām
rotā huuñ aur dāman-e-mizhgāñ bhī tar nahīñ

jī meñ hai phir kareñ iz.hār-e-vafā
phir tire larze hue lab dekheñ

laḌkiyāñ lafz kī tasvīr chhupā letī haiñ
un kā iz.hār bhī iz.hār nahīñ hotā yaar

ruuh suntī hai mohabbat meñ badan bolte haiñ
lafz pairāya-e-iz.hār nahīñ hotā yaar

maiñ kisī nuqta-e-be-lafz kā iz.hār nahīñ
haañ kabhī harf-e-anā vaqt kā irfān thā maiñ

iz.hār-e-haq ke vāste mansūr ab kahāñ
bātil-parast hausla-e-dār kyā kareñ

palkoñ pe koī hai lab-e-iz.hār kī sūrat
rakhtā huuñ maiñ ḳhanjar pe zabāñ dekhte rahnā

zabān-e-insāñ meñ kab hai qudrat kare jo iz.hār-e-shān-e-vahdat
na ibtidā se hai koī vāqif na us kī ma.alūm intihā hai

tamāshā dekhte the hamāre zabt-e-ġham kā
musallat ek Dar thā lab-e-iz.hār chup the

pahle un se duurī rakkhī phir ḳhud hī thā iz.hār kiyā
aise dil ne chāhā un ko ānā-kānī karte karte

yuuñ yaad lagātār kiyā jaa.e kisī ko
āmāda-e-iz.hār kiyā jaa.e kisī ko

qahr Dhaa.e tire iz.hār-e-tamannā ne 'zahīr'
haal kahtā hai kisī se koī daanā dil kā