Tags-Izhar

ġham bhī hai ik parda-e-iz.hār-e-shauq
chhup ke aañsū meñ savāl aa hī gayā

nukta-chīñ dil na thā aur rāh-e-safar mushkil thī
log har moḌ pe karte rahe iz.hār-e-ḳhayāl

na vo iḳhlās-o-mohabbat hai na vo mehr-o-vafā
sheva-e-jaur-o-jafā-o-sitam iz.hār hue

dīvār kī har ḳhisht pe likkhe haiñ matālib
yuuñ shahr ko ā.īna-e-iz.hār kiyā hai

tarjumān-e-ġham-e-dil un kī nazar hotī hai
jin ko aatā nahīñ iz.hār-e-tamannā karnā

jazba-e-ishq kā iz.hār na hone paa.e
husn rusvā sar-e-bāzār na hone paa.e

ġhazab to ye hai vo aisā kah ke ḳhushī kā iz.hār kar rahe the
ki ham ne dastāreñ bech dī haiñ saroñ ko lekin bachā liyā hai

tum ko to vus.at-e-iz.hār pe hai itnā ubuur
jam ke ik sher agar kah do to chhā sakte ho

bahār aa.ī kisī kā sāmnā karne kā vaqt aayā
sambhal ai dil ki iz.hār-e-vafā karne kā vaqt aayā

iz.hār chīḳhtā nahīñ jazbāt mar ga.e
kaise khilaune shahr meñ ījād ho ga.e

dil ko aatā nahīñ iz.hār-e-mohabbat karnā
aur mujh ko tere inkār se Dar lagtā hai

ye aañsū ye pashemānī kā iz.hār
mujhe ik baar phir bahkā ga.ī ho

agar terī ḳhushī hai tere bandoñ kī masarrat meñ
to ai mere ḳhudā terī ḳhushī se kuchh nahīñ hotā

'armāñ' bas ek lazzat-e-iz.hār ke sivā
miltā hai kyā ḳhayāl ko lafzoñ meñ Dhaal kar

ye jo zaḳhmoñ kī tarah lafz mahak uThte haiñ
sirf ik sūrat-e-iz.hār kī bīmārī hai

pattī pattī se huā rañg-e-vafā kā iz.hār
naujavānān-e-chaman ban ga.e tasvīr-e-bahār

dil kī bāteñ dūsroñ se mat kaho luT jāoge
aaj kal iz.hār ke dhandhe meñ hai ghāTā bahut

tab.a kah aur ġhazal, hai ye 'nazīrī' kā javāb
reḳhta ye jo paḌhā qābil-e-iz.hār na thā

ulfat kā nibhānā to baḌī baat hai lekin
is daur meñ iz.hār-e-mohabbat bhī bahut hai

ik tilismī rañg meñ kho jaa.eñ jab chehre tamām
farz hai āñkhoñ pe kyā iz.hār-e-hairānī kareñ