Tags-Jalwa

donoñ jagah jalva-gah-e-yār hai
ḳhvāh idhar ḳhvāh udhar jā.iye

ayaañ hotā hai jyūñ-kar sarv paanī ke kināre par
huā yuuñ jalva-gar āñkhoñ meñ qadd-e-naunihāl us kā

ek jalva par chamak uThtī hai sab aqlīm-e-ishq
kaun aalam hai hamāre dīda-e-bedār kā

na vo parda-dār hai raaz meñ na kisī kī parda-dārī rahī
jo paḌe the parde sab uTh ga.e magar ab bhī jalvagarī rahī

nigāhoñ se jo ojhal us gul-e-ra.anā kā jalva hai
ye rañg-e-shām ye rañg-e-sahar achchhā nahīñ lagtā

jalva az-bas-ki taqāzā-e-nigah kartā hai
jauhar-e-ā.ina bhī chāhe hai mizhgāñ honā

kyā dilkashī hai anjum-o-ḳhurshīd-o-māh meñ
aise na jaane kitne haiñ is jalva-gāh meñ

nau-ba-nau ye jalva-zā.ī ye jamāl-e-rañg-rañg
mohlat-e-dil ek lahza dāman-e-nazzāra tañg

jahāñ pe manzar-e-jalva thā sirf vahm o gumāñ
vahīñ pe jalsa-e-zohra-jamāl hone lagā

vo husn ko jalva-gar kareñge
ārā.ish-e-bām-o-dar kareñge

mere miTne kā kareñ sog kisī ke dushman
kyuuñ udāsī sī kisī jalva-gah-e-nāz meñ hai

qadam hai ain hudūs aur hudūs ain qadam
jo tū na jalve meñ aatā to maiñ kahāñ hotā

usī ne aadam ke naqsh-e-pā ko azal kiyā thā bharam rakhā thā
zamīñ pe jalva-fagan na ho kar bhī jis ne pahlā qadam rakhā thā

jalva-farmā hai jo apne andar use
dam-ba-dam dekhiye jā-ba-jā dekhiye

yaqīñ kar le ki ḳhud vo jalva-gar parde meñ hai varna
yahī zālim gumāñ terā tujhe hairān kar degā

aañkh meñ jalva tirā dil meñ tirī yaad rahe
ye mayassar ho to phir kyuuñ koī nāshād rahe

chhoḌ jaatī hai havā bhī naqsh apne ḳhaak par
sochtā huuñ tū kahāñ par jalva-ārā.ī meñ hai

har parī-zād kī hai jalva-numā ik tasvīr
shīsha-e-dil hai hamārā ki parī-ḳhāna-e-ishq

hai jū-e-shīr ham ko nūr-e-sahar vatan kā
āñkhoñ kī raushnī hai jalva is anjuman kā

parda-e-e'tibār-e-ġhair pairahan-e-ḳhudī hai chaak
husn-e-azal hai jalva-rez sadma-e-dil-gudāz meñ