Tags-Jalwa

lā-makāñ meñ bhī to ik jalva nazar aatā hai
be-kasī meñ to udhar huuñ ki jidhar kuchh bhī nahīñ

dair ho ka.aba ho ki dil kis meñ vo jalva-gar nahīñ
dekh sakūñ magar use itnī mirī nazar nahīñ

tum ko ye hai agar yaqīñ dil meñ vo jalva-gar nahīñ
DhūñDhā karo tamām umr milne kā umr-bhar nahīñ

har tajallī ke liye zarf-e-nazar hai darkār
jalva arzāñ hai magar is qadar arzāñ bhī nahīñ

kasrat hijāb-e-dīda-e-ārif kabhī nahīñ
zarroñ meñ ek mehr kā jalva ayaañ rahā

ka.aba o dair meñ dekhe haiñ usī kā jalva
kufr o islām meñ kab dīda-varāñ jaate haiñ

har vaqt mire sāmne ik jalvagarī hai
maiñ dekh na pā.ūñ to mirī kam nazarī hai

haiñ pahluoñ meñ daaġh jo donoñ taraf 'nasīm'
jalva dikhā rahe haiñ gulistāñ idhar-udhar

mujh ko shām-e-hijr kī ye jalva-ārā.ī bahut
mahkī mahkī yaad terī aur tanhā.ī bahut

udhar sab se parda idhar sab meñ jalva yahāñ vaar aalim vahāñ aur manzar
kahīñ vo ayaañ hai kahīñ vo nihāñ hai kabhī husn-poshī kabhī ḳhud-numā.ī

madad kar zarā aur ai josh-e-ulfat ki armān dil kā nikal jaa.e dil se
kabhī jalva-gah tak guzar ho hamārā abhī rahguzar tak huī hai rasā.ī

udhar paas chilman ke maujūd the vo idhar the pareshān un ke fidā.ī
rahā sharm-o-shoḳhī kā dilkash tamāshā na jalva dikhāyā na sūrat chhupā.ī

'īmān' kī shuā.eñ jalva-numā hoñ jis dam
mīnār raushnī kā ho raushnī se dāman

hai azal suuñ jalva-pairā dil meñ hubb-e-murtazā
is sabab 'dā.ūd' daa.em dushman-e-but-ḳhāna huuñ

māthe pe husn-ḳhez hai jalva gulāl kā
biñdī se auj par hai sitāra jamāl kā

kyā ishq hai kyā shauq hai kyā rashk hai kyā laag
dil jalva-gāh-e-nāz meñ aage hai nazar se

'riyāz' ma.ashūq-e-māh-paikar koī na koī hai jalva-gustar
ki shaam aa.ī hai jo mire ghar vo chāñd laa.ī hai chaudhvīñ kā

goyā vo jalva-gar haiñ nigāhoñ ke rū-ba-rū
is darja e.atibār-e-fareb-e-nazar hai aaj

parvānoñ kā hujūm hai sham.a-e-jamāl par
jiitā phiregā kaun tirī jalva-gāh se

tū hai aur ġhair ke ghar jalva-tarāzī kī havas
ham haiñ aur hasrat-e-dīdār tire kūche meñ