Tags-Jalwa

terī duniyā meñ kahīñ par bhī karūñ maiñ sajda
terā jalva to mire pesh-e-nazar hotā hai

diid kyā chiiz hai jalvoñ meñ nazar kho jaanā
varna jalva kahīñ pāband-e-nazar hotā hai

tire josh-e-hairat-e-husn kā asar is qadar siiñ yahāñ huā
ki na ā.īne meñ rahī jilā na parī kuuñ jalvagarī rahī

jalva phir arz-e-nāz kartā hai
roz bāzār-e-jāñ-sipārī hai

ab koī shāyān-e-jalva hai na shāyān-e-kalām
tū usī manzil meñ behtar hai ki jis manzil meñ hai

justujū hai vahīñ vahīñ hai nazar
jalva-rezī jidhar jidhar kuchh hai

haram-o-dair na jalva-gah-e-jānañ samjhe
kuchh na samjhe yahī ai gardish-e-daurāñ samjhe

qayāmat thā sitam thā qahr thā ḳhalvat meñ o zālim
vo sharmā kar tirā merī baġhal meñ jalva-gar honā

rahbarī kar ke mirī ḳhizr bhī chakkar meñ paḌe
ab unheñ jalva-gah-e-yār meñ akasr jaanā

afsāna mirā ḳhvāb-e-zuleḳhā-e-mohabbat
jalva hai tirā yūsuf-e-kan.ān-e-tamannā

māh-o-anjum meñ bhī us kā husn jalva-rez hai
āftāb ik aks hai husn-e-karishma-sāz kā

maiñ tujhī ko dekhtā huuñ jalva-farmā har taraf
mā-sivā tere mire nazdīk sab ma.adūm hai

tumhārī jalva-gāh-e-nāz meñ andher hī kab thā
ye muusā dauḌ kar kis ko dikhāne sham.a tuur aa.e

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

na jaane kaun sī mahfil meñ ab tum jalva-farmā ho
nazar rah rah ke uThtī hai magar nākām aatī hai

tā hadd-e-taḳhayyul faqat ik jalva hai yā dil
duniyā meñ hamārī na falak hai na zamīñ hai

naqqāsh se mumkin hai ki ho naqsh ḳhilāf
haiñ naqsh meñ jalva-gar usī ke ausāf

har shai meñ numāyāñ hai jalva āñkhoñ se magar mastūr bhī hai
shah-e-rag se qarīñ hai husn-e-azal shahpar se nazar ke duur bhī hai