Tags-Jalwa

fareb-e-jalva kahāñ tak ba-rū-e-kār rahe
naqāb uThāo ki kuchh din zarā bahār rahe

dekhā kabhī nahīñ unheñ ai 'rāz' bazm meñ
jalva kanār-e-bām liyā hai kabhī kabhī

taare chhupte haiñ jhilmilā kar
hai nuur sā jalva-gar falak par

be-ḳhud-e-jalva kabhī aur kabhī hushiyār rahā
kabhī ma.abūd kabhī ḳhud ko maiñ banda samjhā

ye ik terā jalva sanam chaar sū hai
nazar jis taraf kījiye tū hī tū hai

na dikhāte mujhe jalva magar itnā karte
aap kā ġham mirī taskīn kā sāmāñ hotā

na huī jalva-gah-e-nāz kī vus.at ma.alūm
go maiñ har zarra ko ik dīda-e-hairāñ samjhā

terā jalva hai yaar parde meñ
mujh ko parde pe pyaar aatā hai

vo jalva sāmne ho to kaisī duā-salām
bas dekhte hī kaam pe lag jaanā chāhiye

kaisā tilism-e-husn hai us jalva-gāh meñ
jalva nazar meñ hai kabhī parda nazar meñ hai

koī āvāz hai vo koī saaz hai us se hī rañg-o-nik.hat kā dar-bāz hai
jis taraf ho nazar vo rahe jalva-gar kaise socheñge ham phir kisī ke liye

jalva dikhlā.e jo vo apnī ḳhud-ārā.ī kā
nuur jal jaa.e abhī chashm-e-tamāshā.ī kā

mārka-ārā.īyāñ haiñ aaj husn-o-ishq kī
sāmnā is jalva-gah meñ dilrubā se dil kā hai

ye kaisā jalva dikhā rahe ho
nigāh-o-dil meñ samā rahe ho

sūrat-e-lafz-o-ibārāt-o-ma.ānī andar
jalva-gar tuuñ che huā hai mere dīvān meñ aa

vus.at-e-kaun-o-makāñ kā aa.ina
jalva-zār-e-kahkashāñ kā aa.ina

chaman jo ban ke tirā rahguzar guzar meñ rahe
to naḳhl-e-tūr kā jalva shajar shajar meñ rahe

shoḳhī-e-jalva us kī taskīn kyūñke baḳhshe
ā.īnoñ meñ diloñ ke jo hai bhī phir nahīñ bhī

ye jalva-e-gah-e-ḳhās hai kuchh aam nahīñ hai
kamzor nigāhoñ kā yahāñ kaam nahīñ hai