Tags-Jalwa

har ek zarra-e-sahrā hai ā.īna-ḳhāna
hujūm-e-jalva se hairāñ haiñ tere dīvāne dīvāne

ālam-e-imkāñ meñ duniyā kī havā thī maiñ na thā
jalvā-ārā sirf zāt-e-kibriyā thī maiñ na thā

jalva jalve ke muqābil hī rahā
tum na ā.īne se bāhar aa.e

ai 'zafar' charḳh pe ḳhurshīd jo yuuñ kāñpe hai
jalva-gar aaj kahīñ yaar lab-e-bām na ho

na vo andāz na āvāz na ishva na adā
yak-ba-yak miT ga.ī yuuñ jalvagarī kī sūrat

firāqe-e-gul se jo nāla-kash hai qafas meñ bulbul shahīd-e-jalva
bahār-e-gulshan ḳhizāñ-numā hai junūñ-zada abr-e-bahmanī hai

mere tasavvurāt meñ mere taḳhaiyyulāt meñ
ai merī jān-e-ārzū jalva-ba-jalva aa.e jā

har jagah jalve tire merī nazar ke saath haiñ
maiñ pukārūñ tū na ho jalva-numā mumkin nahīñ

pilā kar phir sharāb-e-husn-o-jalva
mujhe be-ḳhud banāyā jā rahā hai

kyā jaane kab vo sub.h-e-bahārāñ ho jalva-gar
daur-e-ḳhizāñ meñ jis se bahalte rahe haiñ ham

bālā-e-jabīñ ḳhuun jab aayā to araq kyā
ai jalva-gah-e-husn tirī dhuup kaḌī hai

yaar kahtā hai tajallī-e-laqā thī maiñ na thā
tūr-e-sīnā par vahī jalva-numā thī maiñ na thā

hai ba-har-shakl ek hī jalva
ham koī intiḳhāb kyā karte

ye hūryān-e-farañgī dil o nazar kā hijāb
bahisht-e-maġhrabiyāñ jalva-hā-e-pā-ba-rikāb

jalva dikhā de ḳhvāb meñ bahr-e-ḳhudā mujhe
āñkheñ taras ga.iiñ tire dīdār ke liye

ḳhāliq ne jab azal maiñ banāyā clerk ko
lauh o qalam kā jalva dikhāyā clerk ko

azal se mahv-e-dīdār-e-jamāl-e-jalva-ārā huuñ
nazar bil-ġhair ho gar ho nazar meñ mā-sivā merī

tā umr phir na tālib-e-jalva hue kalīm
dekhā jo ek baar karishma jamāl kā

asal meñ jalva ye kis kā hai tū hī kah vaa.iz
terā rab aur sahī merā sanam aur sahī