Tags-Jalwa

le ke āñkhoñ meñ tirā jalva kahāñ jā.egā
ġhair ko dekh ke maiñ aañkh badal jā.ūñgā

tujhe ḳhalq kahtī hai ḳhud-numā tujhe ham se kyuuñ ye hijāb hai
tirā jalva terā hai parda-dar tere ruḳh pe kyuuñ ye naqāb hai

ham zamzama-sanj-e-arnī ban nahīñ sakte
tū baam pe kyā jalva-numā ho nahīñ saktā

sarv sābit-qadam is vāste gulshan meñ rahā
nahīñ dekhā kabhī jalva tirī rānā.ī kā

vo aañkh kyā jo aariz o ruḳh par Thahar na jaa.e
vo jalva kyā jo diida o dil meñ utar na jaa.e

faiz-e-ḳhādim-safī se hai 'āsim'
jalva-gar husn-e-yār ā.ankhoñ meñ

koī jalva koī manzar mujh ko bhātā hī nahīñ
chāñd kī sūrat bhī hai be-nūr sī tere baġhair

tū darūn-e-ḳhāna barūn-e-dar tū hazār pardoñ meñ jalva-gar
are o haqīqat-e-parda-var tirī shoḳhiyāñ meñ majāz meñ

baam par jalva-gar hai vo shāyad
kū-e-jānāñ meñ shor-e-mahshar hai

ik jalva-gāh-e-husn thī mahshar na thā 'jalīl'
kyā kyā hasīñ hamārī nazar se guzar ga.e

arsh-o-kursī-o-falak dair-o-haram ka.aba-e-dil
phir bhī mahdūd tirī jalvagarī hotī hai

dikhāyā us ne ban-Than kar vo jalva apnī sūrat kā
ki paanī phir gayā ā.īne par dariyā-e-hairat kā

ziyāda chāñd sūraj se tirā nuur āshkārā hai
na dekheñ terā jalva ham qusūr apnī basārat kā

us kā jalva bhī ik tamāsha hai
nazar aatā hai par nahīñ aatā

jab hijāboñ meñ pinhāñ thā husn-e-butāñ but-parastī kā bhī ek meyār thā
ab to har moḌ par but hī but jalvagar ab kahāñ tak butoñ ko ḳhudā māniye

jalva-gar sochoñ meñ haiñ kuchh āgahī ke āftāb
raushnī se likh rahā huuñ zindagānī kā nisāb

ek hī jalva hai jab hañgāma-ārā-e-shuhūd
phir vahī shāhid vahī mash.hūd honā chāhiye

yuuñ to is jalva-gah-e-husn meñ kyā kyā dekhā
jab tujhe dekh chuke koī na tujh sā dekhā

sarhad-e-jalva se jo aage nikal jā.egī
vo nazar jurm-rasā.ī kī sazā pā.egī

tāqat-e-nazzāra jab minnat-pazīr-e-hosh ho
bahr-jalva phir koī bālā-e-bām aayā to kyā