Tags-Jannat

mai-ḳhāne meñ mazār hamārā agar banā
duniyā yahī kahegī ki jannat meñ ghar banā

jab se baḌoñ kī ghar se hukūmat chalī ga.ī
jannat-numā makān kā naqsha badal gayā

'jāmī' pe kyā banegī ḳhudā jaane hashr meñ
jannat kī aarzū hai gunāhoñ se pyaar bhī

tire kūche meñ kyuuñ baiThe faqat is vāste baiThe
ki jab uTTheñge is duniyā se jannat le ke uTTheñge

kūcha-e-yār hai ki jannat hai
jo gayā phir ke ghar nahīñ aatā

sun rakkho qabl-e-ahd-e-vafā qaul ārzū-e-shaidā.ī kā
jannat bhī hai dozaḳh gar ye huā tum aur kahīñ ham aur kahīñ

usī jannat jahannam meñ marūñgā
ga.e mausam ko āvāzeñ na dūñgā

aadmī ik tazād-e-bāham hai
kabhī jannat kabhī jahannam hai

guzar rahā huuñ kisī jannat-e-jamāl se maiñ
gunāh kartā huā nekiyāñ kamātā huā

kuchh maqsad-e-hayāt na ḳhauf-e-ḳhudā use
jannat kī aarzū hai na mushtāq-e-hūr hai

jazba-e-ishq meñ jannat kī tamannā kaisī
ye bulandī to mirī gard-e-safar hotī hai

na intizār karo in kā ai azā-dāro
shahīd jaate haiñ jannat ko ghar nahīñ aate

jannat kā tazkira kabhī kū-e-sanam kī baat
donoñ jahāñ kā lutf hai jām-e-sharāb meñ

phalūñ phūlūñgā maiñ duniyā se jā kar bāġh-e-jannat meñ
azal se parvarish hotā huuñ maiñ gulzār-e-rahmat meñ

milegī shaiḳh ko jannat, hameñ dozaḳh atā hogā
bas itnī baat hai jis baat par mahshar bapā hogā

talāsh-e-jannat-o-dozaḳh meñ rā.egāñ insāñ
zamīñ pe roz manātā hai kā.enāt kā dukh

ye kis jannat meñ le aayā hai paimān-e-vafā dil ko
ki har sūrat yahāñ ārām-e-jāñ ma.alūm hotī hai

kū-e-jānāñ dekh kar jannat se yuuñ māyūs huuñ
pūchhtā phirtā huuñ kyā jannat isī kā naam hai

kaabe kī to kyā asl hai us kūche se aage
jannat ho to jaa.e na gunahgār tumhārā

lab-e-zāhid pe hai afsāna-e-hūr-e-jannat
kaash is vaqt mirā anjuman-ārā hotā