Tags-Jannat

jo miTTī ko mizāj-e-gul atā kar deñ vo ai vaa.iz
zamīñ se duur fikr-e-jannat-e-ādam to kyā karte

isī duniyā meñ dikhā deñ tumheñ jannat kī bahār
shaiḳh jī tum bhī zarā kū-e-butāñ tak aao

kitnī mehnat huī ḳhuuñ pasīna huā jism miTTī huā rañg mailā huā
ḳhud to jaltā rahā dozaḳhoñ meñ magar ghar ko jannat banāyā hai tere liye

guzre jo apne yāroñ kī sohbat meñ chaar din
aisā lagā basar hue jannat meñ chaar din

vādī-e-gañg-o-jaman jannat-e-nazāra hai
sar-zamīñ apnī zar-o-sīm kā gahvāra hai

ḳhuuñ shahīdān-e-vatan kā rañg lā kar hī rahā
aaj ye jannat-nishāñ hindostāñ āzād hai

jannat kī kyā bisāt ki vo chal ke aa.egī
merī taraf to vādī-e-kashmīr chal paḌe

majlis-e-shaiḳh meñ kal zikr thā jis kā ai dost
hogī jannat bhī koī shai tire pahlū kī tarah

bahut sair kī bāġh-e-jannat kī ham ne magar kuchh mazā zindagī kā na dekhā
kisī dil meñ dard-e-mohabbat na paayā kisī dil meñ dāġh-e-tamannā na dekhā

us ke baġhair jaise jahannam hai zindagī
maiñ jannat-e-adn meñ bahut der tak rahā

muzhda-e-jannat-e-visāl hai maut
zindagī mahshar-e-judā.ī hai

nūr-e-sahar hai jān-e-tasavvur zulmat-e-shab se kaun Dare
laakh banī hai ziist jahannam sāmne jannat aaj bhī hai

jannat se jī larazne lagā jab se ye sunā
ahl-e-jahāñ vahāñ bhī mileñge yahāñ ke ba.ad

ghar se nikle hue beToñ kā muqaddar ma.alūm
maañ ke qadmoñ meñ bhī jannat nahīñ milne vaalī

tujh ko laa.e ghar meñ jannat ko jalāyā rashk se
ham-baġhal tujh se hue pahlū dabāyā huur kā

ye jahāñ ba-nām-e-jannat kahīñ phir na pesh aa.e
vahī qasr-o-bāġh jo haiñ mah-o-kahkashāñ se aage

usī ko kahte haiñ jannat usī ko dozaḳh bhī
vo zindagī jo hasīnoñ ke darmiyāñ guzre

na chāteñgī hamārā ḳhuuñ mashīneñ
baneñgī rashk-e-jannat ye zamīneñ

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge