Tags-Jannat

nafs ko maar kar mile jannat
ye sazā qābil-e-qayās nahīñ

terī sohbat meñ baiThā huuñ
goyā jannat meñ baiThā huuñ

ye maanā ishq se bantī hai jannat zindagī lekin
masā.il zindagī se ishq karne hī nahīñ dete

kis liye kiije kisī gum-gashta jannat kī talāsh
jab ki miTTī ke khilaunoñ se bahal jaate haiñ log

maiñ jab vo jannat bhī chhoḌ aayā to duniyā kyā hai
le maiñ chalā tū sambhāl apnā jahān allāh

ye jannat mubārak rahe zāhidoñ ko
ki maiñ aap kā sāmnā chāhtā huuñ

ai rashk-e-hūr vus.at-e-jannat meñ bhī mujhe
tujh bin hai be-gumān yaqīñ gor-e-tañg kā

thā muqaddas vo mānind-e-jannat kabhī
kū-e-jānāñ se ab maiñ guzartā nahīñ

terī firdaus-ḳhayālī ho mubārak tujh ko
merī jannat mire dāman kī tarī hai ai dost

vo badan jis kā ujālā thā hamārī jannat
dhyān meñ us ke hue aaj magar kaise niDhāl

jannat kī koī huur nazar par chaḌhī nahīñ
duniyā meñ mujh ko ek parī-zād thā pasand

alāhada kar ke ḳhud se mujh ko jo tū ne baḳhshā to ḳhaak baḳhshā
agarche jannat mujhe milī hai ilāhī phir bhī azaab meñ huuñ

chubh rahe haiñ mire ḳhayāloñ ko
bāġh-e-jannat-nishāñ meñ kāñTe

us ke hāthoñ se jo ḳhushbū-e-hinā aatī hai
aisā lagtā hai ki jannat se havā aatī hai

ta.amīr dozaḳhoñ meñ ho shaddād kī bahisht
jannat ko chhoḌ aa.e to ġham dūsrā milā

un kī jannat bhī koī dasht-e-balā hī hogī
zinda rahne ko jo lazzat nahīñ banñe dete

farishte imtihān-e-bandagī meñ ham se kam nikle
magar ik jurm kī pādāsh meñ jannat se ham nikle

kab haq-parast zāhid-e-jannat-parast hai
hūroñ pe mar rahā hai ye shahvat-parast hai

yahīñ jannat yahīñ goyā jahannam
tū hī ab soch ai bande ḳhudā ke

ye jannat bhī hai dozaḳh bhī
nek hai dil meñ bad hai dil meñ