Tags-Jannat

jannat-nishān dhartī sonā ugal rahī hai
jañgal hare bhare haiñ fitrat machal rahī hai

gunāhgār ke dil se na bach ke chal zāhid
yahīñ kahīñ tirī jannat bhī paa.ī jaatī hai

shaad kyā huuñ husūl-e-jannat par
ki rupa.e meñ se ek aanā milā

bhar kar dam-e-naz.a ik dam-e-sard
jannat kī havā meñ so ga.e ham

umr-bhar ke sajdoñ se mil nahīñ sakī jannat
ḳhuld se nikalne ko ik gunāh kaafī hai

chalo sair kar aa.eñ jannat kī 'āshiq'
ajab kuchh tamāshā vahāñ ho rahā hai

kab alag thī mirī duniyā se jo jannat chhoTī
koī apnā thā vahāñ aur na yahāñ haiñ apne

kis ne chādar dhueñ kī taanī hai
mere jannat-misāl manzar par

bāteñ nāseh kī sunīñ yaar ke nazzāre kiye
āñkheñ jannat meñ rahīñ kaan jahannam meñ rahe

hai taḳht to maujūd sulaimāñ kī kamī hai
jannat kā darīcha to hai rizvāñ kī kamī hai

jaane kyuuñ dozaḳh se bad-tar ho ga.e hālāt aaj
rashk-e-jannat kal talak hindostāñ merā bhī thā

mire ḳhvāboñ kī vo be-nām jannat
zamīn-o-āsmāñ ke darmiyāñ ho

jannat-e-husn meñ kiyā haq ne
hauz-e-kausar maqām tujh lab kā

bhulā de arsh kī jannat kā ḳhvāb āñkhoñ ko
bahār-e-husn se yuuñ mālā-māl thā koī

rakhtā hai ibādat ke liye hasrat-e-jannat
zāhid kī ḳhudā saath mohabbat sababī hai

nafrat se mohabbat se aksar ham ne hī likhī taqdīr tirī
ham ne hī zamīn-e-gul tujh ko jannat bhī kiyā aur vīrāñ bhī

ham haiñ vo balā dost ki gulshan kā to kyā zikr
jannat bhī bajā.e qafas o daam na lete

jannat mirī fikr kī hai me.arāj
dozaḳh se to maiñ guzar rahā huuñ

jannat-farosh hūroñ ke dallāl ḳhirqa-posh
kyā pūchhte ho vā.iz-e-farḳhanda-fāl kī

dozaḳh bhī kyā gumān hai jannat bhī hai fareb
in vasvasoñ meñ merī ibādat bhī hai fareb