Tags-Jawani

jis tarah aatā hai piirī meñ javānī kā ḳhayāl
vasl kī shab yaad roz-e-hijr meñ aa.ī mujhe

samjho ki javānī ḳhvāb meñ hai ruḳh bāñhoñ kī mehrāb meñ hai
jab taare dhīme paḌ jaa.eñ jab sham.eñ maddham ho jaa.eñ

javānī sail-e-sher-o-bāda-e-naġhma sahī lekin
ye tūfān-e-latāfat ḳhud-baḳhud maddham bhī hotā hai

safed baal hue shab huī javānī kī
damīda sub.h huī chauñk sar pe dhuup aa.ī

javānī yaad ham ko apnī phir be-iḳhtiyār aa.ī
huā dīvānoñ meñ jab ġhul bahār aa.ī bahār aa.ī

har ek jaam pe ye naġhma-e-hazīñ saaqī
ki is javāni-e-fānī kā e'tibār nahīñ

mausam-e-husn to thā fasl-e-jafā bhī aa.ī
saath hī saath javānī kī adā bhī aa.ī

laḌakpan jā chukā un kā javānī aane vaalī hai
kabhī mujh par jafā hotī thī lekin qahr ab hogā

bahāreñ luTā diiñ javānī luTā dī
tumhāre liye zindagānī luTā dī

ajab hausla ham ne ġhuncha kā dekhā
tabassum pe saarī javānī luTā dī

na kī husn kī qadr ai māh-e-kāmil
faqat raat bhar meñ javānī luTā dī

na khonā thā ġhaflat meñ ahd-e-javānī
ajab raat thī ye suhānī luTā dī

ab guḌiyā paToloñ se ilāqa nahīñ 'māhīn'
bachpan se nikal aa.ī javānī meñ rahūñgī

apne vaqt-e-javānī meñ ye shoḳh ḳhudā hī jaane 'nazīr'
kis kis kā zar lūTegī aur kis kis kā ghar ghālegī

sab ye kahte haiñ mujhe tujh se jo dil yaar lagā
haa.e kyā is ko javānī meñ ye āzār lagā

ġhazal jab chheḌ detā hai koī ahd-e-javānī kī
kisī kā jism-e-mauzūn-o-ġhazal-ḳhvāñ yaad aatā hai

ahd-e-tiflī se ye kahtā thā mizāj-e-jānāñ
dekh lenā ki javānī meñ badal jā.ūñgā

bāġhoñ pe chhā ga.ī hai javānī saaqī
siskī vo havā-e-zindagānī saaqī

vahshat meñ basar hote haiñ ayyām-e-shabāb aah
ye shām-e-javānī hai ki saaya hai hiran kā

ġhārat kiyā aḳhīr javānī meñ dahr ko
duniyā tamām luuT lī thoḌī sī raat meñ