Tags-Jawani

bazm meñ be-parda aayā muskurā kar sāmne
nā-tavāñ dil ko mire phir se javānī de gayā

bachpanā kam-sinī javānī aaj
tere har daur se mohabbat hai

be-kaif javānī hai be-dard zamāna hai
nākām-e-mohabbat kā itnā hī fasāna hai

vo chaal aTkheliyoñ se chal kar dil o jigar rauñde Dālte haiñ
abhī javānī kā hai jo aalam na dekhte haiñ na bhālte haiñ

vo bahkī nigāheñ kyā kahiye vo mahkī javānī kyā kahiye
vo kaif meñ Duube lamhoñ kī ab raat suhānī kyā kahiye

sadqa sadqa kyuuñ na ho jā.ūñ bhalā ġhash khā ke maiñ
dekh gadrā.ī huī uThtī javānī aap kī

ġhaflat meñ kaTī jaatī hai 'mahrūm' javānī
achchhā nazar aatā nahīñ anjām tumhārā

meñ vo kashtī huuñ kabhī jis ko kinārā na milā
le liyā apnī javānī kā sahārā maiñ ne

dil-o-dimāġh hai ab kis ko zindagānī kā
jo koī dam hai to afsos hai javānī kā

āñkheñ ḳhayāl ḳhvāb javānī yaqīn saañs
kyā kyā nikal rahā hai kisī ke hisāb meñ

jī meñ zinda ho ga.iiñ kyā ḳhvāhisheñ bisrī huī
phir koī yūsuf zuleḳhā ko javānī de gayā

zulf o ruḳh donoñ haiñ jaane se javānī ke ḳharāb
mushk vo mushk na kāfūr vo kāfūr rahā

hue aaj būḌhe javānī meñ kyā the
jab uTThe the zaanū se haath āshnā the

duniyā se alag ho ke guzartī hai javānī
hālāñ ki ye mumkin nahīñ purkhoñ se sunā hai

tajarbe bāñdh ke gaThḌī meñ rakhe kāñdhoñ par
ik buḌhāpā bhī javānī se nikal aayā hai

husn ko ham ne amar kahā thā pyaar ko sachchā jaanā thā
ek javānī ke kas-bal par saare sach jhuTlā.e the

sirf javānī ke kuchh din hī umr kā hāsil hote haiñ
aur javānī ke ye din bhī ham ko raas na aa.e the

haañ ye sarshāriyāñ javānī kī
aañkh jhapkī hī thī ki raat ga.ī

haañ maze luuT le javānī ke
phir na aa.egī ye jo raat ga.ī

chheḌ kar tazkira-e-daur-e-javānī royā
raat yāroñ ko sunā kar maiñ kahānī royā