Tags-Jawani

ahd-e-javānī ro ro kaaTā piirī meñ liiñ āñkheñ muuñd
ya.anī raat bahut the jaage sub.h huī ārām kiyā

ye terī uThtī javānī ye chhāñv tāroñ kī
ye bhīnī bhīnī mahak ye nayā shabāb tirā

jo marnā thā to āḳhir kyoñ na maut i javānī meñ
dil-e-zinda ko baiThā ro rahā huuñ zindagānī meñ

ta.ajjub kyā agar mujh ko mohabbat phir javāñ kar de
jhalak hai husn-e-yūsuf kī zuleḳhā kī javānī meñ

ḳhauf se shahr sahme mile the sabhī
ġham-zada un meñ un kī javānī milī

vo javānī vo mohabbat vo sharārat kā nasha
vo mirī umr kā hissa bhī ġhazal jaisā thā

raat bhī niiñd bhī kahānī bhī
haa.e kyā chiiz hai javānī bhī

javānī ḳhud aatī hai sau husn le kar
javāñ koī ho ham hasīñ jānte haiñ

merā dil taakā gayā jaur o jafā ke vāste
jab ki puure rañg par un kī javānī ho chukī

gunāh ke tund-o-tez sho.aloñ se ruuh merī bhaḌak rahī thī
havas kī sunsān vādiyoñ meñ mirī javānī bhaTak rahī thī

guzārī hai javānī rūThne meñ aur manāne meñ
ghaḌī-bhar kī javānī hai na tum samjhe na ham samjhe

javānī zindagānī hai na tum samjhe na ham samjhe
ye ik aisī kahānī hai na tum samjhe na ham samjhe

mere bayāñ meñ sehr-bayānī tujhī se hai
rū-e-suḳhan pe ḳhūn-e-javānī tujhī se hai

kyuuñ javānī kī mujhe yaad aa.ī
maiñ ne ik ḳhvāb sā dekhā kyā thā

adab ta.alīm kā jauhar hai zevar hai javānī kā
vahī shāgird haiñ jo ḳhidmat-e-ustād karte haiñ

javānī ko sazā-e-lazzat-e-ehsās de denā
maiñ is had par ḳhudā ko aadmī mahsūs kartā huuñ

rañg kahte haiñ kahānī merī
kis kī ḳhushbū thī javānī merī

'buḳhārī' tum javāñ ho aur javānī ek nashsha hai
tumhārī dāstān-e-ġham mujhe sun kar ta.ajjub hai

mirī do-chār ummīdeñ bar aa.ī thiiñ javānī meñ
mire allāh itnī baat par mahshar ta.ajjub hai

'anīs' yuuñ huā hāl-e-javānī-o-pīri
baḌhe the naḳhl kī sūrat gire samar kī tarah