Tags-Jawani

kyā sunogī mirī majrūh javānī kī pukār
merī fariyād-e-jigar-doz mirā nāla-e-zār

ḳhaak meñ aah milā.ī hai javānī maiñ ne
shola-zāroñ meñ jalā.ī hai javānī maiñ ne

husn meñ tū be-badal hai ishq meñ tū lā-javāb
raam kī tujh meñ javānī tujh meñ siitā kā shabāb

jaate rahe javānī ke saath apne saare josh
'sābir' vo valvale vo umañgeñ rahīñ nahīñ

tū mohabbat kā sitāra to javānī kā suhāg
husn lau detā hai la.al-e-yaman kyā kahnā

is mohabbat us javānī kī qasam
phir na ye nīndeñ na ye bedāriyāñ

thī bahār-e-chaman javānī par
jabki ujḌā thā āshiyāñ apnā

ham josh-e-javānī meñ aa kar ik lā-mahdūd safar meñ the
ma.alūm huā manzil ye na thī jab ghaaT kināre aa pahuñche

tum ne ye shādāb javānī
kaise aur kis tarah guzārī

ik adā mastāna sar se paañv tak chhā.ī huī
uf tirī kāfir javānī josh par aa.ī huī

ai ham-nafas na pūchh javānī kā mājrā
mauj-e-nasīm thī idhar aa.ī udhar ga.ī

vafā kī baat na kar ḳhvāhisheñ bachā apnī
mujhe aziiz ta.alluq tujhe javānī hai

an-ginat shādāb jismoñ kī javānī pī gayā
vo samundar kitne dariyāoñ kā paanī pī gayā

hai abhī mere buḌhāpe meñ javānī kaisī
hai abhī un kī javānī meñ laḌakpan kaisā

ye shoḳhiyāñ ye javānī kahāñ se laa.eñ ham
tumhāre husn kā saanī kahāñ se laa.eñ ham

bachpan kā daur ahd-e-javānī meñ kho gayā
ye amr-e-vāqi.a bhī kahānī meñ kho gayā

jitne din ziist ke baaqī haiñ nichhāvar kar duuñ
phir jo mil jaa.e javānī kī koī raat mujhe

bhūlā nahīñ maiñ aaj bhī ādāb-e-javānī
maiñ aaj bhī auroñ ko nasīhat nahīñ kartā

rahī agarche nigāroñ kī mehrbānī bhī
bahut ḳharāb kaTī raat bhī javānī bhī

jab bād-e-bahārī aatī hai har gul pe javānī chhātī hai
khil jaate haiñ mire zaḳhm-e-jigar aur daaġh daraḳhshāñ hote haiñ