Tags-Jawani

tirā husn so rahā thā mirī chheḌ ne jagāyā
vo nigāh maiñ ne Daalī ki sañvar ga.ī javānī

dekh kar joban tirā kis kis ko hairānī huī
is javānī par javānī aap dīvānī huī

dahr ke ġham se huā rabt to ham bhuul ga.e
sarv qāmat ko javānī ko qayāmat likhnā

do din ke liye ham aa.e haiñ ik shab kī javānī laa.e haiñ
firdaus-e-sarā-e-hastī meñ ham rañg-e-gul-e-mahtāb haiñ ham

sāġhar-o-mīnā meñ lahrātī hai har mauj-e-sharāb
ik javānī kā talātum aaj maiḳhāne meñ hai

ye ham ko us kī javānī ne aur iizā dī
ki raat din koī siine meñ dil ko maltā hai

javānī aa ga.ī dil chhedne kī baḌh ga.iiñ mashqeñ
chalānā aa gayā tīr-e-nazar āhista āhista

aa.ina dekhūñ to 'sābir' ye gumāñ hotā hai
aks mujh se vo ḳhat-e-ḳhāl-e-javānī māñge

jo ek baar anal-haq kī nazr kar de to
hazār baar ḳhudā tujh ko phir javānī de

tīrgī ke dhāgoñ meñ ḳhuun kī ravānī hai
dard hai mohabbat hai husn hai javānī hai

na.e ġhamoñ ke añdheroñ se jañg hai us kī
bujhe diyoñ kī javānī talāsh kartā hai

yā-rab vo javānī bhī kyā mahshar-e-armāñ thī
añgḌā.ī bhī jab letī ek aañkh jhapak jaatī

sitam kī ḳhvāhisheñ 'beḳhud' ġhazab kī ārzueñ haiñ
javānī ke ye din shāyad musībat ban ke aate haiñ

nek-o-bad ḳhuub samajhtā huuñ karūñ kyā ki abhī
sunñe detā nahīñ āshob-e-javānī vaa.iz

piine kī sharāb aur javānī kī sharāb aur
hushyār ke ḳhvāb aur haiñ madhosh ke ḳhvāb aur

maiñ pal do pal kā shā.ir huuñ pal do pal mirī kahānī hai
pal do pal merī hastī hai pal do pal mirī javānī hai

'charḳh' dekhe jo javānī ke ubharte jalve
zindagī apnī gunāhoñ se bachā.ī na ga.ī

ai tarab-zār javānī kī pareshāñ titlī
tū bhī ik bū-e-giraftār hai ma.alūm na thā

maiñ ne jis vaqt tujhe pahle-pahal dekhā thā
tū javānī kā koī ḳhvāb nazar aa.ī thī

koī bhī saath detā nahīñ umr-bhar yahāñ
kuchh din rahegī saath javānī hī kyuuñ na ho