Tags-Jawani

sharāb-e-husn ko kuchh aur hī tāsīr detā hai
javānī ke numū se be-ḳhabar honā laḌakpan meñ

arbal ke bhañvar meñ ga.ī hai Duub javānī
jis vaqt uThā jag mane tūfān buḌhāpā

kaun pāband-e-junūñ fasl-e-bahārāñ meñ na thā
is baras nañg-e-javānī thā jo zindāñ meñ na thā

ḳhush-hāliyāñ dehlī kī bajā aaj bhī lekin
yaad aatī hai kalkatte kī vo shoḳh javānī

samay kī āñkhoñ se dekhiye to har ek khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

abhī aa jā.eñge le kar sabhī asbāb mahshar ke
maiñ yūñhī pūchh baiThā thā javānī kis ko kahte haiñ

ai pīr-e-ḳhirad-mandāñ dil kī bhī zarūrat hai
ye shahr-e-ġhazālāñ hai ye mulk-e-javānī hai

ik zehn-e-pareshāñ meñ ḳhvāb-e-ġhazalistāñ hai
patthar kī hifāzat meñ shīshe kī javānī hai

ḳhvāb jaisī hī koī apnī kahānī hotī
yuuñ to barbād na ye apnī javānī hotī

bachpan aur javānī būḌhī umr ke dar pe haiñ
tīnoñ zamānoñ kī yakjā.ī kaisī lagtī hai

kar javānī pe rahm 'jur.at' kī
bas ġham-e-ishq is javāñ ko chhoḌ

yuuñ tirī chashm-e-mudārāt pe dil bholā hai
nashsha-e-mai pe javānī kā gumāñ ho jaise

mehrbāñ mujh pe hai ik shāḳh-e-gulāb
kaise mahke na javānī merī

laḌkhaḌāne kī puurī koshish hai
āḳhirī moḌ hai javānī kā

pī to letā huuñ magar piine kī vo bāteñ ga.iiñ
vo javānī vo siyah-mastī vo barsāteñ ga.iiñ

do pal kī thī andhī javānī nā-dānī kī bhar paayā
umr bhalā kyuuñ biite saarī ro ro kar pachhtāne meñ

ho ga.ī nazr-e-vatan hastī-e-fānī terī
na to piirī rahī terī na javānī terī

yuuñ to milte haiñ sabhī log bichhaḌne ke liye
nā-gahānī ye javānī meñ na rakkhī jaa.e

ishq hai ahd-e-javānī ke liye
ahd-e-pīrī ke taqāze aur haiñ

jab ḳhizāñ kī nazr ho jā.egī duniyā se shabāb
yaad 'aḳhtar' ye sitam-ārā javānī aa.egī