Tags-Jawani

vo husn-o-javānī kī rāteñ vo kaif-o-tarannum kī bāteñ
vo la.al-o-gohar kī barsāteñ ham log manānā kyā jāneñ

rag rag meñ lahū ko garmāte jaate haiñ vatan kī jai gaate
ham ahd-e-javānī ke maate būḌhoñ kā zamāna kyā jāneñ

kuchh nahīñ sochtā javānī meñ
ye bhī tārīk raat hai shāyad

ravish ravish pe javānī ke tājdār aa.e
junūñ ke qāfile vābasta-e-bahār aa.e

'qalaq' har vaqt ab hai sāmnā taklīf-e-pīrī kā
javānī luuT kar sab le ga.ī asbāb rāhat kā

na dekhā muḌ ke bhī phir ahd-e-pīrī meñ javānī ne
abas mazkūr karte ho tum aise be-muravvat kā

ḳhvāb hī ḳhvāb javānī kā muqaddar the kabhī
ḳhvāb se baḌh ke gale mil ga.ī ta.abīr ab ke

na chheḌ ai dil javānī kī kahānī
kisī kī dil-sitānī kī kahānī

aish-o-ishrat se sadā kaam javānī meñ rahā
sher-o-naġhma se shab-o-roz sajā.e kyā kyā

aaj maiñ soch rahā huuñ shab-e-tanhā.ī meñ
kis qadar talḳh javānī kī luTī yādeñ haiñ

maiñ ne chāhā thā ki insān kī azmat ke liye
ek mazlūm javānī ko sahārā de duuñ

kaun sā vaqt amal kā hai javānī ke sivā?
niiñd kab aatī hai? pūchhā to javānī likkhī

kyuuñ be-rañg kiyā hai merī oḌhnī ko
tere ġham kī dhuup ne bharī javānī meñ

dil bhī gardan bhī hathelī pe liye phirtā huuñ
jaane kab kis kā lahū terī javānī māñge

lahlahātī huī bharpūr javānī terī
gungunātī huī barsāt kā ā.īna hai

kuchh ranj-e-dilī 'mīr' javānī meñ khiñchā thā
zardī nahīñ jaatī mire ruḳhsār se ab tak

laTeñ chand chāñdī kī baḳhshīñ tujhe jā
vidā.a letī mujh se javānī kahe hai

terī nau-ḳhez javānī ke kuñvāre motī
jagmagāte rahe vijdān ke ā.īne meñ

ġhalat-fahmiyoñ meñ javānī guzārī
kabhī vo na samjhe kabhī ham na samjhe

zo.af o nā-tāqatī o sustī o a.azā-shikanī
ek ghanTe meñ javānī ke baḌhā kyā kyā kuchh