Tags-Judai

hairān huuñ hijāb-e-judā.ī uThā na kyuuñ
vo nāznīñ the maiñ to koī nā-tavāñ na thā

agar mujh se judā hone kī tū ne Thaan hī lī hai
judā.ī Daal pahle darmiyāñ mere sar o tan ke

zaar huuñ tāqat se mil jaane ko tāqat chāhiye
nā-tavānī se judā.ī kī tavānā.ī nahīñ

'sharaf' dam toḌte haiñ ik parī-rū kī judā.ī meñ
ajab aalam hai un kā dekh aa.e jis kā jī chāhe

is sitam-pesha ne qurbat kā na marham rakkhā
umr-bhar detā rahā zaḳhm-e-judā.ī mujh ko

ajab huā ki girah paḌ ga.ī mohabbat meñ
jo ho sake to judā.ī meñ raas aayā kar

raushan hai shab-e-hijr ba-andāz-e-ta.alluq
vo mehr-e-nazar dāġh-e-judā.ī nahīñ detā

itnī shiddat se na mil tū ki judā.ī chāheñ
yahī qurbat tirī duurī kā bahāna ban jaa.e

jaane kis moḌ judā.ī kī ghaḌī aatī hai
hijr kī bel muñDeroñ pe chaḌhī aatī hai

judā.ī kī ghaḌī hai dushman-e-dil
balā hai ye nahīñ Taltī hai Tal ke

milā to de ke judā.ī chalā gayā āḳhir
hamāre hisse meñ tanhā safar rahā āḳhir

sabr aatā hai judā.ī meñ na ḳhvāb aatā hai
raat aatī hai ilāhī ki azaab aatā hai

hai ab tak sehr sā chhāyā tirī jādū-navā.ī kā
dil-e-urdu pe ab tak daaġh hai terī judā.ī kā

sar judā ham ne apnā kar Daalā
aa.ī jab guftugū judā.ī kī

dil bhī jaltā ho judā.ī meñ sharāre kī tarah
giilī lakḌī kī tarah jaan bhī sulgā.ī ho

pāñchoñ havās kī bazm sajā kar us kī yaad meñ baiThe the
ham se pūchho shab-e-judā.ī kab kab pattā khaḌkā thā

ye mulāqāt āḳhirī to nahīñ
ham judā.ī ke Dar se pūchhte haiñ

sabr kī mujh ko judā.ī meñ hai talqīn fuzūl
ye to jab ho ki rahe sham.a se parvāna judā

shikva-e-dard-e-judā.ī pe vo farmāte haiñ
ranj sahne ko hamārā sā jigar paidā kar

kahīñ ilāhī shab-e-judā.ī tamām hone ko aa ga.ī hai
numūd-e-sub.h-e-jazā ho shāyad ki maiñ ne dekhā hai ḳhvāb-e-āriz