Tags-Judai

yādoñ kā tasalsul hai ghanghor judā.ī hai
sāvan kī tarah ye bhī chhā.ī huī lagtī hai

vo ḳhush-dahan kī judā.ī señ narm gulshan meñ
har ek ġhuncha hai rañg-e-malāl kā shīsha

kabhī kabhī to judā.ī kī lazzateñ de kar
rafāqatoñ meñ nayā rañg bhar ga.e haiñ log

koī lahza judā.ī meñ taḌapne se na fursat thī
kabhī pahlū meñ dil mānind-e-bismil ham bhī rakhte the

aane vaale mausamoñ kī sar-phirī pāgal huā
ek din terī judā.ī ke tarāne gā.egī

yahī dīvār-e-judā.ī hai zamāne vaalo
har ghaḌī koī muqābil meñ khaḌā rahtā hai

mil ke ham us se jo Tuk soveñ to dukh dene ko
baḳht-e-bad ḳhvāb judā.ī kā dikhātā hai hameñ

balā-e-mahshar bhī sahal un ko azāb-e-dozaḳh bhī un ko āsāñ
jo terī ulfat meñ apne dil par ġham-e-judā.ī uThā chuke haiñ

ye khaa.ī mas.ale kā hal nahīñ hai
judā.ī mas.ale kā hal nahīñ hai

guzartā hī nahīñ mausam judā.ī ke dayāroñ kā
milan-rut ke kināroñ se havā vāpas palaT aa.e

vaañ rasā.ī nahīñ to phir kyā hai
ye judā.ī nahīñ to phir kyā hai

be-rahm judā.ī kā sabab bhī nahīñ ma.alūm
ik-gūna ta.alluq kā bharam bhī nahīñ ab ke

haqīqat ne chakkar meñ Daalā thā ham ko tarīqat bure vaqt par kaam aa.ī
hama-dast kā mas.ala jab hai aage to kaisī duī aur kaisī judā.ī

ḳhushk ḳhushk sī palkeñ aur suukh jaatī haiñ
maiñ tirī judā.ī meñ is tarah bhī rotā huuñ

judā.ī taak meñ baiThī huī thī
mohabbat kar rahe the mashvaroñ se

judā.ī meñ tirī āñkhoñ ko jhiil karte hue
subūt zaa.e.a kiyā hai dalīl karte hue

tirī judā.ī kā ġham hai na tere milne kā
maiñ apnī aag meñ din raat jaltā rahtā huuñ

dam-e-vidā.a meñ yuuñ muskurā rahā huuñ 'nasīm'
ki jaise un se judā.ī kī bhī ḳhushī hai bahut

ye terī merī judā.ī kā naqsh hai bādal
baras rahā hai ba-yak-vaqt vaañ bhī chhā.e hue

us se milne kā samāñ us se judā.ī kī ghaḌī
aur phir kuchh bhī nahīñ sūd-o-ziyāñ mere liye