Tags-Judai

nafas kī āmad-o-shud kā ye aalam hai judā.ī meñ
ki nashtar jaise paivast-e-rag-e-jāñ hote jaate haiñ

kyā batā.ūñ tirī judā.ī meñ
jo mirā hāl-e-zār hotā hai

hai ġham-e-roz-e-judā.ī na nashāt-e-shab-e-vasl
ho ga.ī aur hī kuchh shām-o-sahar kī sūrat

sitam kī jaur kī bedād kī kaafī shahādat hai
judā.ī meñ mirā betāb be-ḳhud be-ḳhabar honā

de to gayā azāb-e-judā.ī mujhe magar
girheñ jo dil meñ thiiñ vo unheñ kholtā gayā

har mulāqāt kā anjām judā.ī kyuuñ hai
ab to har vaqt yahī baat satātī hai hameñ

bahut kuchh yaad aatā hai 'ra.īs' un kī judā.ī meñ
magar jaise koī ḳhvāb-e-pareshāñ yaad aatā hai

lahū meñ tair ga.ī vo ghaḌī judā.ī kī
ki jis ke zahr ne jiinā mirā muhāl kiyā

ye maiñ ne maanā judā.ī mirā muqaddar hai
magar ye baat na muñh se kaho ḳhudā ke liye

abhī shajar se judā.ī ke din na aa.e the
pakā huā thā vo phal phir bhī ḳhaam kitnā thā

ek bīmār-e-judā.ī huuñ maiñ aaphī tis par
pūchhne vaale judā jaan ko khā jaate haiñ

visāl ho yā rahe jaddā.ī tumhārī ai jaan jaisī marzī
jo apnī hālat thī maiñ ne kah dī ab aage merī majāl kyā hai

maiñ ne āñkhoñ se tujhe duur kiyā thā lekin
ye na sochā thā ḳhudā aisī judā.ī degā

bas vahī ik be-kaif udāsī bas vahī banjar sannāTā
sau sau rañg milan ke dekhe ek hī rañg judā.ī kā

dil kī zamīñ par bo.e the 'bāqar' biij jo dard judā.ī ke
chaliye ab vo fasl khaḌī hai vaqt aayā hai kaTā.ī kā

piitā huuñ judā.ī meñ tirī ghūñT lahū kī
sun ġhuncha-dahan āshiq-e-dil-gīr kī āvāz

jo na thā vo ġhairat-e-gulsitāñ to karūñ ab us kā maiñ kyā bayāñ
ki alam judā.ī kā har zamāñ mire ek dil pe hazār thā

vo aag lagā.ī hai tire hijr ne dil meñ
har lamha judā.ī kā sharar hone lagā hai

is qadar musalsal thiiñ shiddateñ judā.ī kī
aaj pahlī baar us se maiñ ne bevafā.ī kī

tere lahje kī thakan meñ tirā dil shāmil hai
aisā lagtā hai judā.ī kī ghaḌī aa ga.ī dost