Tags-Judai

tujh ko mushkil hai to judā.ī kī
ibtidā maiñ karūñ ḳhudā-hāfiz

musāfirān-e-rah-e-shauq aur tez qadam
ki chand gaam hī ab manzil-e-judā.ī hai

kyā kahūñ kyā mirī hālat huī sun kar ye payām
kuchh tumheñ merī judā.ī kā bhī ġham hai ki nahīñ

hai kaun shai jis kī zid nahīñ hai jahāñ ḳhushī hai malāl bhī hai
ġham-e-judā.ī na khā tū ai dil firāq hai to visāl bhī hai

lamhe lamhe kī nā-rasā.ī hai
zindagī hālat-e-judā.ī hai

tirī judā.ī kā nīlam alag se rakkhā hai
kiyā nahīñ use duniyā ke zevrāt meñ gum

chalā hai pahlū se yaar uTh kar ġham-e-judā.ī ko Tālte haiñ
kabhī to ham dil ko thāmte haiñ kabhī jigar ko sambhālte haiñ

sab ek se the tulū-o-ġhurūb-e-jāñ us ke
judā.ī meñ bhī vo naqsh-e-jamīl chhoḌ gayā

'nazīr' aah dil kī judā.ī burī hai
baheñ kyuuñ na āñkhoñ se aañsū ke naale

hai bahut dushvār marnā ye sunā karte the ham
par judā.ī meñ tirī ham ne jo dekhā sahl hai

tulū-e-sub.h-e-safar kī ghaḌī thī yaad aayā
judā.ī rāsta roke khaḌī thī yaad aayā

maiñ tirī aañkh ko tashbīh duuñ maiḳhāne se
aur ḳhud zahr-e-judā.ī kā talabgār rahūñ

paas rah kar judā.ī kī tujh se
duur ho kar tujhe talāsh kiyā

jis kī judā.ī ne mujhe shā.ir banā diyā
paḌhtā huuñ maiñ ġhazal bhī usī kī likhī huī

ek dard-e-judā.ī kā ġham kyā kareñ
kis maraz kī davā hai tire shahr meñ

vaqt-e-ruḳhsat nishānī jo talab kī to kahā
daaġh kaafī hai judā.ī kā agar yaad rahe

ḳhat-e-to.am kī tarah āshiq o māshūq haiñ ek
donoñ bekār haiñ jis vaqt judā.ī ho jaa.e

tujh ko hai ham se judā.ī aarzū
mere dil meñ shauq hai dīdār kā

dil le ke burā.ī karte haiñ lo aur suno lo aur suno
phir zikr-e-judā.ī karte haiñ lo aur suno lo aur suno

maiñ TuuT jaatā huuñ aur duur jā bikhartā huuñ
agar judā.ī kā sadma zarā bhī hotā hai