Tags-Kamar

kyuuñ zulf darāz kholte ho
kyā ḳhauf tumheñ nahīñ kamar kā

manzūr hai nāpnā kamar kā
paimāna banā.iye nazar kā

rahī gar talāsh-e-kamar yuuñ hī ham ko
koī dam meñ mulk-e-adam dekhte haiñ

yaar to qatl-e-ām kar Daale
teġh bāñdhe kahāñ kamar hī nahīñ

vahm hī vahm meñ apnī huī auqāt basar
kamar-e-yār ko bhūle to dahan yaad aayā

kuchh dahan hī nahīñ hai vo nāpaid
kamar-e-yār bhī hai nā-ma.alūm

teġh kyuuñ chalne meñ bal khāne lagī
ye tirī nāzuk kamar kā kaam hai

koī kamar ko tirī kuchh jo ho kamar to kahe
ki aadmī jo kahe baat soch kar to kahe

kamar kā tere jis dam naqsh ham ījād karte haiñ
to jaañ farmān aa kar ma.anī o bahzād karte haiñ

TukḌe nigāh-e-nāz se dil aap kā durust
vahm-e-nazar se duur hamārī kamar daroġh

zulm par bāñdhī hai phir sayyād-o-gulchīñ ne kamar
qaid-e-bulbul kī hai gulshan meñ pukār ab ke baras

jaise lahrā.e koī sho.ala-kamar kī ye lachak
sar-ba-sar ātish-e-sayyāl badan kyā kahnā

resham ke lachchhe haiñ baal maḳhmal ke TukḌe haiñ gaal
hai ye nazākat kā haal patlī kamar baal hai

kamar-e-yār thī az-bas-ki nihāyat nāzuk
sūjhtī bandish-e-mazmūñ kī koī ghaat na thī

qatl-e-āshiq pe kamar bāñdhī hai ai dil us ne
par ḳhudā hai ki use naam mirā yaad rahe

ham dekheñ kis din husn ai dil us rashk-e-parī kā dekheñge
vo qad vo kamar vo chashm vo lab vo zulf vo mukhḌā dekheñge

joban se Dhal chalī haiñ kahāñ ab laTak kī chaal
vo pech un ke mū-e-kamar se nikal gayā

kamar bāñdho muqaddar ke sahāre baiThne vaalo
shikast-e-razm se rāhoñ kā pech-o-ḳham na badlegā

ek taraf bañgāl kā jaadū
sar se kamar tak gesū hī gesū

dekh mohan tirī kamar kī taraf
phir gayā maanī apne ghar kī taraf