Tags-Kamar

kyā ham ne bigāḌā hai kyuuñ ham ko satātā hai
kyuuñ zulm par ai zālim bāñdhī hai kamar tū ne

is terī banāvaT se hai saaf hameñ zāhir
āshiq ke miTāne par bāñdhī hai kamar tū ne

saarī ḳhushbū simaT aa.ī alif-e-qāmat kī
gul-e-tar kāf-e-kamar se nahīñ jaane vaalā

dekhoge chashm-e-nargis-e-jādū ba-kām-e-dil
dekhoge zulf tā-ba-kamar jāgte raho

haañ jānte haiñ jaan kā ḳhvāhāñ tumhīñ ko ham
mālūm hai ki teġh tumhārī kamar meñ hai

kyuuñ khīñchte ho teġh kamar se che-fā.eda
muddat se is kī aab hai merī nigāh meñ

ham aur farhād bahr-e-ishq meñ bāham hī kuude the
jo us ke sar se guzrā aab merī tā-kamar aayā

kuuch kar ga.e jaane kitne qāfile jin kā kuchh nishāñ nahīñ miltā
maiñ bhī huuñ kamar-basta ya.anī rah-rav-e-rāh-e-raftagāñ to maiñ bhī huuñ

mahrūm thiiñ rah ga.e kahte haiñ ye sab log
jāñ-bāzoñ ko kas kar vo kamar khol rahā hai

kamar pe laad ke chalte rahoge tanhā.ī
tamām umr milegā nahīñ kahīñ koī ghar

ghaTte ghaTte meñ rahā ishq-e-kamar meñ aadhā
jāma-e-tan ko mire chāhiye niimā kahnā

ye bār-e-amānat tū uThātā to hai lekin
nāzuk hai kamar terī lachak jaa.e to kyā ho

tirī vasf kā kamar ke na bañdhā kisī se mazmūñ
rahe ḳhvāb meñ adam tak jo ka.ī ḳhayāl bandāñ

nashsha-e-marg sī ik lahr lahū meñ chamkī
jab qabā utrī to ḳhanjar bhī kamar se niklā

vo dahāñ vo kamar hī hai maqsūd
aur kuchh ab nahīñ ḳhayāl hameñ

ik tere taġhāful ne kamar toḌ ke rakh dī
varna ġham-e-duniyā to mujhe baar nahīñ hai

Dartā huuñ maiñ ye gum na kare aap ko kahīñ
phir ja.ad ko huī hai rasā.ī kamar talak

kamāl-e-ishq dikhāne pe ab kamar bāñdho
na.ī zamīñ hai mazāmīn pur-asar bāñdho