Tags-Kamar

musāfirān-e-gumāñ raheñ kyuuñ kamar-ḳhamīda
chalo ye pushtāra-e-tamannā utārte haiñ

vo jis ke bojh se ḳham bhī na thī hamārī kamar
ham aaj aa.e haiñ vo qarz bhī adā kar ke

aur bhī siina kasne lagtā aur kamar bal khā jaatī
jab bhī us ke paañv phisalne lagte the Dhalvānoñ par

adam-ābād meñ aane kā sabab hai zāhir
justujū-e-kamar-e-yār liye phirtī hai

bahut udaas ho tum aur maiñ bhī baiThā huuñ
ga.e dinoñ kī kamar se kamar lagā.e hue

ai shauq-e-shahādat kahīñ qismat na palaT jaa.e
bāñdhī to hai talvār bhī qātil ne kamar bhī

uThne kī nahīñ dekhiye shamshīr-e-nazar bhī
pahle hī lachaktī hai kalā.ī bhī kamar bhī

kamar yaar kī nā-tavānī meñ DhūñDī
tavahhum hue darmiyāñ kaise kaise

aur chal phir le zarā tan tan ke ai bāñke javāñ
chaar din ke ba.ad phir TeḌhī kamar ho jā.egī

ek nāzuk belt
tumhārī kamar se ham-āġhosh hai

ye misra-e-muḳhbir-e-musībat kamāl ham ko pasand aayā
'nasīm' jaago kamar ko bāñdho uThāo bistar ki raat kam hai

safar hai dushvār ḳhvāb kab tak bahut paḌī manzil-e-adam hai
'nasīm' jaago kamar ko bāñdho uThāo bistar ki raat kam hai

DhūñDe se bhī na ma.ani-e-bārīk jab milā
dhokā huā ye mujh ko ki us kī kamar na ho

jis ko chalnā hai chale raḳht-e-safar bāñdhe hue
ham jahāñ-gasht haiñ uTThe haiñ kamar bāñdhe hue

maiñ thā gum-karda-e-ishq-e-kamar yaar
kabhī anqā se DhuñDhvāyā to hotā

dahan meñ aap ke albatta ham ko hujjat hai
kamar kā bhed jo pūchhūñ miyāñ nahīñ ma.alūm

mānī-o-bahzād ne mulk-e-adam kī raah lī
vo kamar mutlaq na paa.ī laakh maare haath paañv

talab ke uqda-e-mushkil kuuñ khole
jo koshish kī kamar yakbār bāñdhe

jo ishq-bāzoñ ko āzmāyā lagā ke chhuriyāñ ye qahr Dhāyā
yahāñ yahāñ tak lahū bahāyā ki naubat aa.ī kamar kamar kī

bārīk-bīñ huuñ shā.er-e-nāzuk-ḳhayāl huuñ
mazmūñ jahāñ kamar kā mile bāñdh lā.ūñ maiñ