Tags-Kamar

kamar ko gardan ko dast-o-lab ko visāl meñ lutf de rahā hai
shabāb-e-zānū shabāb-e-bāzū shabāb-e-sīna shabāb-e-āriz

dekhiye tā-kamar zulf kā sho.abada
uljhaneñ ban ga.iiñ dāstāñ dekhiye

tumhāre log kahte haiñ kamar hai
kahāñ hai kis tarah kī hai kidhar hai

sun kar jalā huuñ tuur sā muusā kamar miyāñ
firaunī-e-raqīb o tirī lan-tarāniyāñ

baḌhā baḌhā ke jafā.eñ jhukā hī doge kamar
ghaTā ghaTā ke 'qamar' ko hilāl kar doge

kuchh kam nahīñ nāzuk mire mazmūn-e-kamar se
shohra hai bajā yaar kī nāzuk-kamarī kā

ye nā-tavāñ huuñ ki huuñ aur nazar nahīñ aatā
mirā bhī haal huā terī hī kamar kā sā

kyā shai hai vo kamar jo guzartā hai ye ḳhayāl
aatī hai ġhaib se ye sadā kuchh na pūchhiye

jis ko chalnā hai chale raḳht-e-safar bāñdhe hue
ham jahāñ-gasht haiñ uTThe haiñ kamar bāñdhe hue

bād-e-tundī se miyāñ terī mujhe hairat hai
kyūñki rakhtā hai tapāñchoñ ko kamar ke aage

andāz ġhazab hai ye butoñ kā
hāthoñ ko kamar pe dhar ke chalnā

dhuup bārish havā kamar-basta
aur darīche meñ ek guldasta

dil meñ kamar ke rahtī hai har lamha har ghaḌī
kartī nahīñ hai dil se kināra tumhārī yaad

jab dekhtā huuñ un ko tab tā-kamar paḌe haiñ
ye baal mere jī ke pīchhe magar paḌe haiñ

rakkhā hai Thaur mujh ko kahrave ke naach ne
kūlhā kahīñ ko jaave hai us kaa, kamar kahīñ

tamām umr gurezāñ rahā thā jis se maiñ
qadam lahad meñ jo rakkhe kamar usī se milī

maḳhfī kī bayāz bhī to dekheñ
mazmūn to DhūñDhiye kamar kā

ma.adūm hue jaate haiñ ham fikr ke maare
mazmūñ kamar-e-yār kā paidā nahīñ hotā

kyuuñ na vo chashm-e-shauq meñ khaTke
ai parī-rū kamar tirī mū hai

shāhid-e-hastī-e-mutlaq kī kamar hai aalam
log kahte haiñ ki hai par hameñ manzūr nahīñ