Tags-Kashti

vasl ke lamhoñ kī gintī karne vaale haath hiddat se tahī haiñ
mauj meñ aa.e hue dariyā meñ kashtī kaun Daale

koī kanār-e-ābjū baiThā huā hai sar-nigūñ
kashtī kidhar chalī ga.ī jaane kidhar bhañvar ga.e

lauT to aa.ī hai sāhil pe magar ḳhauf meñ hai
kashtī kī aañkh se utrā nahīñ mañjhdār kā rañg

ham apnī kashtī sarāb-gāhoñ meñ Daal kar muntazir khaḌe haiñ
na paar lagte na Dūbte haiñ har ik ravānī thamī huī hai

Daal do bahr-e-havādis meñ ḳhudā par kashtī
nā-ḳhudā dām-e-tavahhum meñ giraftār sahī

aaj tak koī kashtī is taraf nahīñ aa.ī
pāniyoñ ke ghere meñ aisā huuñ jazīra maiñ

jo Dūbtī jaatī hai vo kashtī bhī hai merī
jo TūTtā jaatā hai vo paimāñ bhī mirā hai

tumhāre dukh ik kāġhaz par likh kar
us kī ek kashtī banā.ī jā saktī hai

ab dil kā safīna kyā ubhre tūfāñ kī havā.eñ sākin haiñ
ab bahr se kashtī kyā khele maujoñ meñ koī girdāb nahīñ

chalī hai mauj meñ kāġhaz kī kashtī
use dariyā kā andāza nahīñ hai

ek TuuTī huī kashtī sā banā baiThā huuñ
na ye miTTī na ye paanī na havā merī hai

har shaḳhs bad-havās ḳhabar ke sabab se thā
kashtī meñ intishār bhañvar ke sabab se thā

chhed hī chhed haiñ faqat jis meñ
aisī kashtī kā bādbān huuñ maiñ

bhaTak rahī thī jo kashtī vo ġharq-e-āb huī
chaḌhā huā thā jo dariyā utar gayā yaaro

jis ne kashtī ko Duboyā sar-o-sāmān samet
vo ghanī mauj kināre se nikal kar aa.ī

kashtī bhī nahīñ badlī dariyā bhī nahīñ badlā
aur Dūbne vāloñ kā jazba bhī nahīñ badlā

kashtī shikast-ḳhurda-e-dariyā-e-ishq haiñ
jaate haiñ tirte Dūbte tūfāniyoñ meñ ham

mirā nasīb ki kashtī kināre lag na sakī
havā kā jhoñkā to vaise mire ḳhilāf na thā

ab to kashtī ke muāfiq hai havā
nāḳhudā kyā der hai lañgar khule

mauj-dar-mauj bhañvar khīñch rahā thā mujh ko
merī kashtī ke liye koī kināra kab thā