Tags-Kashti

kisī ko miltī hai kashtī kisī ko parvāreñ
hamāre hisse meñ girdāb likkhā jaatā hai

ho rahī hai jism meñ akḌan baḌī
is liye ho jaa.e kushtī bas abhī

nikle na phañs ke gesu-e-pur-pech-o-ḳham se dil
sāhil pe ḳhaak pahuñche jo kashtī bhañvar meñ hai

dariyā se yaarī bhī kitnī mushkil hai
maiñ kashtī ke TukḌe chun kar aayā huuñ

mirī TuuTī huī kashtī thapeḌe mauj-e-tūfāñ ke
ḳhudā-e-pāk tere nāḳhudā hone kā vaqt aayā

vo achchhā thā jo beḌā mauj ke rahm o karam par thā
ḳhizar aa.e to kashtī Dūbtī ma.alūm hotī hai

kabhī dariyā uThā laate haiñ apnī TuuTī kashtī meñ
kabhī ik qatra-e-shabnam se tuġhyānī bhī karte haiñ

dīdanī hai us kī hasrat us kā armāñ us kā shauq
jis kī kashtī Duub jaa.e aa ke sāhil ke qarīb

ham pī ga.e jo ashk qarīb-e-mizha aayā
kashtī huī jab ġharq to sāhil ke barābar

na fikr-e-varta thī us ko zarā bhī
vo kashtī ziist kī khetā gayā hai

mujhe lahroñ kī kashtī par biThā kar
bhañvar kī khoj meñ dariyā gayā hai

Dubo kar dekh kashti-e-tamannā bahr-e-hastī meñ
ubhar aa.egā ḳhud sāhil kisī nau-ḳhez tūfāñ se

yahāñ to har din hai ik sunāmī hai ek jaisī har ik kahānī to kyā sunoge
magar vo ik ḳhasta-hāl kashtī jo misl-e-lāsha paḌī huī hai vo shā.irī hai

jhiil patvār vāpas na degī kabhī
apnī kashtī ab apne sahāre uThā

udaas āñkhoñ se tak rahā thā mujhe vo chhūTā huā kinārā
shikasta kashtī se jab maiñ dariyā ke paar utrā to maiñ ne dekhā

Dūbne vālo! dekh rahe ho tum to kashtī ke taḳhte
dekho dekho ġhaur se dekho dauḌ rahā hai sāhil kyā

girya-e-sad-sirrī aur ham kam-hausla
kashtī apnī aa ga.ī tūfān meñ

kisī ne bhej kar kāġhaz kī kashtī
bulāyā hai samundar paar mujh ko

mirī qismat kī kashtī bahr-e-ġham meñ Duub saktī thī
tirī taqdīr se shāyad mirī taqdīr ubhrī hai

jahāñ suus ne bahr se sar nikālā
maiñ samjhā hai kashtī tabāhoñ kī gaThrī