Tags-Kashti

kashtī ko ḳhudā par chhoḌ bhī de kashtī kā ḳhudā ḳhud hāfiz hai
mushkil to nahīñ in maujoñ meñ bahtā huā sāhil aa jaa.e

safīna naav kashtī baan mallāh
bahe paanī to vo āb-e-ravāñ hai

is tarah se kashtī bhī koī paar lage hai
kāġhaz kā banā haath meñ patvār lage hai

kināre lag ga.ī mere bhī shauq kī kashtī
mire rafīq tū ab shauq se kinārā kar

maiñ ki kāġhaz kī ek kashtī huuñ
pahlī bārish hī āḳhirī hai mujhe

haath mire patvār bane haiñ aur lahreñ kashtī merī
zor havā kā qaa.em hai dariyā kī ravānī baaqī hai

kabhī aur kashtī nikāleñge ham
abhī apnā dariyā hai Thahrā huā

phir kisī yaad kī kashtī meñ ravāñ haiñ lamhāt
jū-e-dil raqs meñ hai vādi-e-jāñ raqs meñ hai

apne hī maqtūl Thahre apne hī qātil bane
apne hī hāthoñ se ham kashtī bhañvar tak le ga.e

achchhā yaqīñ nahīñ hai to kashtī Dubā ke dekh
ik tū hī nāḳhudā nahīñ zālim ḳhudā bhī hai

maiñ bhī ban jā.ūñgā phir sahar-e-havā se kashtī
raat aa jaa.e to phir tum bhī samundar honā

tūfān-e-mohabbat laakh uThe tūfān se lekin hāsil kyā
jo Duub ga.ī vo kashtī kyā jo haath aayā vo sāhil kyā

dhāre se kabhī kashtī na haTī aur sīdhī ghaaT par aa pahuñchī
sab bahte hue dariyāoñ ke kyā do hī kināre hote haiñ

'nūh' ko tūfān-e-ġham se ḳhauf kyā
us kī kashtī Dūbne vaalī nahīñ

apnī kashtī to Duub hī jaatī
azm-e-mohkam ko nāḳhudā kahiye

shikasta kashtī ke taḳhte pe so rahā huuñ maiñ
thapeḌā maujoñ kā aa kar mujhe jagā le koī

patvār bhī uThāne kī mohlat na mil sakī
aisī chalī havā.eñ ki kashtī ulaT ga.ī

na kārvāñ kā hamāre koī nishān rahā
na ham-safar na hī kashtī na bādbān rahā

mauj-e-tūfāñ meñ ab mirī kashtī
nāḳhudā chhoḌ de ḳhudā ke liye

baḳhshish ye jo rakhtā hai ba-kaf bahr hai kashtī
kyā jāniye ye kis se hai saa.il nahīñ ma.alūm