Tags-Kashti

jise mauj-e-balā chūme musalsal
mirī kashtī kā aisā bādbāñ ho

tūfān kā sheva to hai kashtī ko Dubonā
ḳhāmosh kināroñ ne bhī dil toḌ diyā hai

dil kisī vaqt kisī par bhī fidā ho jaa.e
ye vo kashtī hai ki patvār nahīñ hai koī

maiñ kashtī meñ akelā to nahīñ huuñ
mire hamrāh dariyā jā rahā hai

maiñ bahr-e-ġham ko dekh liyā nā-ḳhudā ba-rū
kashtī na ho pa aab hai merī nigāh meñ

baaqī āsār haiñ bas qahr-e-ḳhudā ke har-sū
koī tūfāñ hai na kashtī na kināra baaqī

imroz kī kashtī ko Dubone ke liye huuñ
kal aur kisī rañg meñ hone ke liye huuñ

chāñd kī kashtī tah-e-dariyā huī thī jis jagah
kuchh nishāñ baaqī rahe koī bhañvar baaqī rahe

ḳhudā yā nā-ḳhudā ab jis ko chāho baḳhsh do izzat
haqīqat meñ to kashtī ittifāqan bach ga.ī apnī

dariyā ko apnī mauj kī tuġhyāniyoñ se kaam
kashtī kisī kī paar ho yā darmiyāñ rahe

Dūbte Dūbte kashtī ko uchhālā de duuñ
maiñ nahīñ koī to sāhil pe utar jā.egā

ḳhil.at shahīd-e-nāz ko bhijvāte haiñ javāb
kashtī meñ pahle phūloñ kī chādar lagā.iye

sailāb-e-ashk ne mire raste kiye haiñ band
kashtī mañgā ke muttasil-e-dar lagā.iye

is baat pe hairāñ haiñ sāhil ke tamāshā.ī
ik TuuTī huī kashtī har mauj se Takrā.ī

merī kashtī ko kināre pe lagāte bhī nahīñ
apnā kahte hai magar rishta nibhāte bhī nahīñ

tūfān meñ kashtī khete haiñ kohsār se Takkar lete haiñ
ham jañg meñ sar de dete haiñ ham paañv haTānā kyā jāneñ

ik junūñ hai jo saath chaltā hai
kashtī-o-bādbān meñ kyā hai

dariyā se abhī tak hai vahī rabt hamārā
kashtī meñ hamārī koī patvār nahīñ hai

mere paas ek kashtī hai
jo paanī kī āvāz aur lams se ajnabī hai

bachā bachā ke rakhā thā jise vahī kashtī
supurd-e-mauja-e-dariyā hai dekhiye kyā ho