Tags-Khafa

ham se har-chand vo zāhir meñ ḳhafā haiñ lekin
koshish-e-pursish-e-hālāt chalī jaatī hai

nāma-bar ḳhat de ke us nau-ḳhat ko tū ne kyā kahā
kyā ḳhatā tujh se huī aur vo ḳhafā kyūñkar huā

shikva karūñ to yaar kā pur-ḳhauf hai yahī
nāzuk mizāj hai vo ye sun kar ḳhafā na ho

is liye zill-e-ilāhī se ḳhafā haiñ rāteñ
un ke aivān meñ kyuuñ ḳhāk-basar aane lage

ahl-e-dil aur bhī haiñ ahl-e-vafā aur bhī haiñ
ek ham hī nahīñ duniyā se ḳhafā aur bhī haiñ

ġhunche ke chaTakne pe na gulshan meñ ḳhafā ho
mumkin hai kisī TuuTe hue dil kī sadā ho

rañg-e-arbāb-e-razā-e-pesha mubārak ho tujhe
koī hotā hī nahīñ tujh se ḳhafā merī tarah

ḳhafā hai karam-farmā hai kaun jaane
havā jab diye ko bujhātī nahīñ hai

ab kyā banegī un se tabī.at bigaḌ ga.ī
ab ḳhush raheñ vo jaan se apnī ḳhafā haiñ ham

ai dil tū unheñ dekh ke kuchh aise taḌapnā
aa jaa.e hañsī un ko jo baiThe haiñ ḳhafā se

kaun kahtā hai ham tum judā ho ga.e
zindagī se achānak ḳhafā ho ga.e

sitam kare bhī to samjhūñ ki ye sitam hī nahīñ
ḳhafā huā bhī to jānoñ ki tū ḳhafā na huā

kisī ne dil jo dukhāyā kabhī to ham 'irfān'
udaas ho ga.e lekin ḳhafā nahīñ hue haiñ

ghaTte the saath saath kabhī titliyoñ ke par
ab kyuuñ ḳhafā ḳhafā se ho ik mere saath par

do ghaḌī aur dil lubhātā jā
kyuuñ ḳhafā ho ke yaar uThtā hai

ye to vaqt vaqt kī baat hai hameñ un se koī gila nahīñ
vo hoñ aaj ham se ḳhafā ḳhafā kabhū ham se un ko bhī pyaar thā

mumkin hai ḳhuub khul ke ho guft-o-shunīd aaj
vo bhī ḳhafā hai ham bhī haiñ kuchh bad-gumān se

ye kyā huā ki Dubo kar mujhe baḌe din se
ḳhafā ḳhafā sī nadī hai bhañvar udaas udaas

juuñ nam-e-ashk tū kis se hai ḳhafā
yaañ koī pal meñ gire baiThe haiñ

vo tum se ḳhafā hai to use jā ke manā lo
kyuuñ aur ḳharāb apne ye hālāt karo ho