Tags-Khafa

apne bhī ḳhafā mujh se haiñ begāne bhī nā-ḳhush
maiñ zahr-e-halāhal ko kabhī kah na sakā qand

baat kuchh bhī na thī kyuuñ ḳhafā ho gayā
jo thā apnā mirā ġhair sā ho gayā

ab us gulāb ne kāñTe kī ik chubhan bhī na dī
milā zarūr vo mujh se magar ḳhafā na milā

terā ġham ham dīvānoñ ko kis aalam meñ chhoḌ gayā
ek zamāna ham se ḳhafā hai ek jahāñ se ham barham

ka.ī din hue haiñ 'nazīr' ab ki ḳhafā hai ham se vo ġhuncha-lab
use kyā vale hameñ roz-o-shab na to sabr hai na qarār hai

sunñe vaalo ġhaur na karnā varna ḳhafā ho jāoge
jin ko ham ne dost kahā hai ham un se begāne haiñ

chaar harf us but-e-pur-ḳhūñ ke upar bhej 'nazīr'
aap se aap jo ho jaa.e ḳhafā tīsre din

yuuñ mat kaho 'ḳhizāñ' ki bahut der ho ga.ī
haiñ āj-kal vo tum se ḳhafā kam bahut hī kam

ghar se niklūñ to manā kar lā.ūñ
vo tabassum jo ḳhafā hai lab se

vo gaañv kā ik za.iif dahqāñ saḌak ke banñe pe kyuuñ ḳhafā thā
jab un ke bachche jo shahr jākar kabhī na lauTe to log samjhe

kabhī bolnā vo ḳhafā ḳhafā kabhī baiThnā vo judā judā
vo zamāna naaz o niyāz kā tumheñ yaad ho ki na yaad ho

ḳhafā hue bhī kisī se to kyā kiyā ham ne
bahut huā to rahā dil kā qahr āñkhoñ meñ

dil meñ ik jañg thī jo jaarī rahī
koī to shaḳhs thā ḳhafā mujh meñ

ranjisheñ aisī hazār aapas meñ hotī haiñ dilā
vo agar tujh se ḳhafā hai tū hī jā mil kyā huā

shakl hī aisī banā.ī hai tirī allāh ne
mat ḳhafā ho gar huā maiñ tujh pe maa.il kyā huā

kahāñ jā.egā dard un kī judā.ī kā ḳhafā ho kar
mire dil se nikal kar mere pahlū se judā ho kar

kal zindagī se apnī kuchh aise ḳhafā thā maiñ
tum ne ye samjhā siine se armāñ nikal gayā

duniyā hī nahīñ ḳhud se ḳhafā rahtā huuñ 'arshad'
jiine kā ye andāz hī fan mere liye hai

phir ḳhatā pūchh lī tum ne to sazā se pahle
aisī bātoñ se hī 'ḳhālid' vo ḳhafā hotā hai

idhar ye fardā ḳhafā hai mire taġhāful se
udhar ḳhulūs se maazī bulā rahā hai mujhe