Tags-Khafa

havā kuchh aisī chalī hai 'faizī' tamīz apnoñ kī ab hai mushkil
mirī tamannā bhī kuchh ḳhafā hai vafā bhī dāman chhuḌā rahī hai

umr-e-rafta na kabhī aa.e manāne ke liye
muddateñ guzrīñ ki jiine se ḳhafā rahtā huuñ

chāhe ham koī jatan karte magar honā thā kyā
be-sabab thā jo ḳhafā us ko ḳhafā rahnā hī thā

tārīf ho rahī hai abhī thoḌī der ba.ad
ḳhush hone vaale saare ḳhafā hone vaale haiñ

ḳhush huuñ yā dost se ḳhafā huuñ maiñ
āj-kal kuchh nayā nayā huuñ maiñ

yuuñ hī hairān-o-ḳhafā joñ ġhuncha-e-tasvīr hoñ
umr guzrī par na jaanā maiñ ki kyuuñ dil-gīr hoñ

jān-o-dil le ke ab ḳhafā hai kyuuñ
ham ne kahnā tirā na maanā kyā

ḳhudā.ī ko bhī ham na ḳhush rakh sake
ḳhudā bhī ḳhafā kā ḳhafā rah gayā

jān-e-ālam tujhe 'hazīñ' kī qasam
ab na honā kabhī ḳhafā ham se

umr guzrī manāne meñ un ke
vo ḳhafā se rahe sadā ham se

e'tibār-e-ishq kī ḳhāna-ḳharābī dekhnā
ġhair ne kī aah lekin vo ḳhafā mujh par huā

jo ḳhafā hai ḳhafā nahīñ hotā
ham ne gar sach kahā nahīñ hotā

maiñ aa.ina thā chhupātā kisī ko kyā rāhat
vo dekhtā mujhe jab bhī ḳhafā to honā thā

gah ham se ḳhafā vo haiñ gahe un se ḳhafā ham
muddat se isī tarah nibhī jaatī hai bāham

aaj yuuñ mujh se milā hai ki ḳhafā ho jaise
us kā ye husn bhī kuchh merī ḳhatā ho jaise

ḳhafā tum se ho kar ḳhafā tum ko kar ke
mazāq-e-hunar kuchh fuzūñ chāhtā huuñ

jo bhī hai saaf saaf bole vo
be-ḳhabar hai ḳhafā ḳhafā kyā hai

maiñ sulh jo huā ġhalat ilzām se ḳhafā
ab pūchhte ho baat meñ talḳhī kahāñ se aa.ī

milte haiñ is adā se ki goyā ḳhafā nahīñ
kyā aap kī nigāh se ham āshnā nahīñ

jis kā Dar thā vahī huā yaaro
vo faqat ham se hī ḳhafā niklā