Tags-Khat

ḳhuld-parvar hai har nigāh-e-sahar
ye ḳhat-e-jām hai ki rāh-e-najāt

husn thā terā bahut ālam-fareb
ḳhat ke aane par bhī ik aalam rahā

qāsid likhūñ lifāfa-e-ḳhat ko ġhubār se
tā jaane vo ye ḳhat hai kisī ḳhāksār kā

hāla-e-mah pahuñche hai nuh us ko nai ḳhat-e-sāġhar us ko lage hai
ā.īna tum le kar dekho kaan kā baalā zulf kā halqa

kis ko hisār-e-husn kahūñ maiñ kis ko ḳhat-e-parkār kahe dil
muñh se ulaT burqā ko dikhā do kaan kā baalā zulf kā halqa

dilāo hazrat-e-dil tum na yād-e-ḳhat-e-sabz us kā
kahīñ aisā na ho ye sam hameñ bhī ho tumheñ bhī ho

ḳhat baḌhā kākul baḌhe zulfeñ baḌhīñ gesū baḌhe
husn kī sarkār meñ jitne baḌhe hindū baḌhe

ḳhat le ke gayā jo vo kabūtar nahīñ miltā
kyā zikr kabūtar kā hai ik par nahīñ miltā

tum ne likkhā hai mire ḳhat mujhe vāpas kar do
Dar ga.iiñ husn-e-dil-āvez kī rusvā.ī se

aayā jo likhte likhte tire qurb kā ḳhayāl
ḳhat bhī ulajh gayā hai mirī baat kī tarah

shīsha-e-dil meñ mire tere ḳhayāl-e-ḳhat se
aa gayā baal hai to mol use kyā letā hai

us kā kabhī javāb na aayā na aa.egā
ye jānte hue bhī use ḳhat likhā karūñ

koī tohfa na koī ḳhat na kisī kī tasvīr
aur mire ghar se tire ġham ke sivā kyā niklā

ġhusse meñ barhamī meñ ġhazab meñ itaab meñ
ḳhud aa ga.e haiñ vo mire ḳhat ke javāb meñ

raushan shabāb meñ jo huī sham-e-rū-e-yār
dūd-e-charāġh husn-e-ḳhat-e-ambarīñ huā

tū vo 'markaz' hai ḳhudā.ī kā zuhūr
ḳhatt-e-fāsil ko banāyā yaar ne

jaan detā hai sabza-e-ḳhat par
ḳhizr har roz zahr khātā hai

phir jalāo.ge kabhī tālib-e-dīdār kā ḳhat
saikḌoñ āñkhoñ se us ne tumheñ dekhā dekhā