Tags-Khat

ḳhatt-e-āriz jo tarashne se miTe hai ye muhāl
chhīlne se nahīñ qismat kā likhā chhil jaatā

ḳhat bhī diyā to qāsid-e-ġhaflat-shi.ār ko
naama mirā bañdhā huā bāzū-e-shal meñ hai

apne purāne ḳhat lene vo aa.ī thī mire kamre meñ
mez pe do tasvīreñ dekhīñ ḳhat le jaanā bhuul ga.ī

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

koī mujh jaisā hī roz aatā hai āñkhoñ meñ liye sabza-e-dasht
ik harā ḳhat dar-o-dīvār ko detā hai chalā jaatā hai

bastī bastī ḳhat-e-gum-gashta sā āvāra huuñ
kal kahāñ koī mujhe rok le maiñ kyā jānūñ

maiñ havas ke gird chāhat kā hunar bantā rahā
us ke ḳhat merī vafādārī ke naam aate rahe

barsoñ se kaan par hai qalam is umiid par
likhvā.e mujh se ḳhat mire ḳhat ke javāb meñ

ḳhvāhish-e-vasl kā mazmūñ jo kisī satr meñ thā
kyā kahūñ ḳhat ko mire paḌh ke vo kyā kyā uchhlā

bas ki fa.ālummā-yurīd hai aaj
har silah shor englistāñ kā

ġhālib ye hai ki mausam-e-ḳhat vaañ qarīb hai
aane lagā hai muttasil us kā payām yaañ

qāsid ke badan par alif-e-zaḳhm lage haiñ
ḳhat kā mire likkhā ye javāb aap ne kyā ḳhuub

māñge baġhair mujh ko apnī kitāb denā
us meñ chhupā ke mere ḳhat kā javāb denā

tumhāre hijr meñ ye haal ho gayā apnā
kisī kā ḳhat ho use bhī sambhāl rakhte haiñ

baḳhsh mere gunāh kuuñ aa mil
ḳhat nahīñ ye ḳhat-e-muāfī hai

be-ḳhatī meñ ayaañ hai sabza-e-ḳhat
tere aariz meñ bas ki saafī hai

peshtar ḳhat se mazā thā husn kā ai naunihāl
ho gayā dāġhī tirā seb-e-zanaḳhdāñ āj-kal

kal merī ek pyārī sahelī kitāb meñ
ik ḳhat chhupā rahī thī ki tum yaad aa ga.e

ġhalat ki sāne.a ko ho gavārā ḳharāsh-e-añgusht-hā-e-nāzuk
javāb-e-ḳhat kī ummīd rakhte jo qaul-e-juffil-qalam na hotā