Tags-Khoon

duniyā merī zindagī ke din kam kartī jaatī hai kyuuñ
ḳhuun pasīna ek kiyā hai ye merī mazdūrī hai

kaise tārīḳh farāmosh karegī ham ko
teġh par ḳhuun se likkhā huā inkār haiñ ham

kiyā hai ḳhūn-e-tamannā ne surḳh-rū kyā kyā
tamām kaam huā arz-e-nā-tamām ke ba.ad

aah ye barsāt kā mausam ye zaḳhmoñ kī bahār
ho gayā hai ḳhūn-e-dil āñkhoñ se jaarī in dinoñ

jis parinde ne kiyā ta.amīr de kar ḳhūn-e-dil
bijliyoñ kī zad meñ us kā āshiyāñ bhī jal uThā

nahīñ zarūr ki takmīl-e-mudda.ā dekheñ
magar hai jī meñ ki ḳhūn-e-jigar bahā dekheñ

arsh kī aaḌ meñ insān bahut khel chukā
ḳhūn-e-insān se haivān bahut khel chukā

ye mai-kashī kā sabaq hai na.e nisāb ke saath
ki ḳhūn-e-dil hameñ piinā hai ab sharāb ke saath

gar charāġhoñ meñ ḳhuun baaqī thā
shab ko talvār kar liyā hotā

sirf paanī pe to qabza thā mere dushman kā
mujh meñ jo ḳhuun kā dajla thā mirā apnā thā

ashk' apne sīna-e-pur-ḳhūñ meñ sail-e-ashk bhī
rok rakhtā huuñ jigar ke ḳhuun kī tahlīl tak

ek ik qatra joḌ kar rakkhā
ḳhuun saarā nichoḌ kar rakkhā

ā.ina-ḳhānoñ meñ kyā rakkhā hai hairat ke sivā
kūcha-o-bāzār meñ ḳhūn-e-masīhā dekhte

qatl karnā be-gunāhoñ kā koī āsān hai
ḳhushk qātil kā lahū hai ḳhūn-e-bismil dekh kar

un kī taqdīr meñ hai mere lahū meñ bharnā
ḳhuun kī bū tire dāmān-e-qabā dete haiñ

merā ḳhuun piyā to us ko taaza lahū kī chaaT lagī
ab vo nāgin apnī zabāñ se apnā lahū bhī chāTtī hai

ġham kī shīrīñ talḳhiyāñ jiine kā sāmāñ ho ga.iiñ
bijliyāñ ḳhūn-e-rag-e-jān-e-gulistāñ ho ga.iiñ

tājir yahāñ agar haiñ yahī ġhairat-e-yahūd
paanī bikegā ḳhūn-e-shahīdāñ ke bhaav par

zamīñ hogī kisī qātil kā dāmāñ ham na kahte the
akārat jā.egā ḳhūn-e-shahīdāñ ham na kahte the

ulTā na irāq-o-shām-o-halab duniyā na huī vīrān to kyā
jal-thal na lahū se to ne bharā to ḳhūn-e-musalmāñ kuchh na kiyā