Tags-Khoon

ḳhūn-e-a.adā se na ho ḳhūn-e-shahīdāñ hī se ho
kuchh na kuchh is daur meñ rañg-e-chaman nikhrā to hai

mausam-e-gul meñ tirā ham se judā ho jaanā
yaad aa.e to hameñ ḳhuun rulā.e kyā kyā

'raunaq' ne un ke haath se bazm-e-raqīb meñ
ik ḳhūn-e-dil piyā hai milā kar sharāb meñ

sar-e-maqtal bikhar jaate haiñ is meñ Dūbne vaale
mohabbat har qadam par ḳhuun kā tāvān letī hai

ḳhuun se khīñch ke ashk ko apne laatā huuñ in āñkhoñ tak
kitnī mushkil se maiñ ḳhud par riqqat taarī kartā huuñ

kaise bujhā.eñ kaun bujhā.e bujhe bhī kyuuñ
is aag ko to ḳhuun meñ hal kar diyā gayā

khā ga.ī ḳhuun kī pyāsī vo zamīñ ham ko hī
shauq thā kūcha-e-qātil kī havā khāne kā

har ik shai aur mahñgī aur mahñgī hotī jaatī hai
bas ik ḳhūn-e-bashar hai jis kī arzānī nahīñ jaatī

dekhā tujhe jo ḳhūn-e-shahīdāñ se surḳh-posh
turk-e-falak zamīñ meñ ḳhajālat se gaḌ gayā

roz ḳhūn-e-ārzū hotā hai phir bhī pyaar hai
ham ko ai hastī tire dilchasp bāzāroñ ke saath

dosto pairāhan-e-jāñ ḳhūn-e-dil se surḳh-tar
baḌh gayā hai iltifāt-e-gul-ezārāñ in dinoñ

in par merā ḳhūn-pasīna lagtā hai
ye jo maiñ zaḳhmoñ kī poshish kartā huuñ

shāḳh par ḳhūn-e-gul ravāñ hai vahī
shoḳhī-e-rañg-e-gulsitāñ hai vahī

ḳhuun ke ghūñT pī rahā huuñ maiñ
ye mirā ḳhuun hai sharāb nahīñ

aaj dekhā sab ne qātil kī tahī-dastī kā haal
sail-e-ḳhūn-e-āshiqāñ meñ bah ga.e shamshīr-o-sañg

baḌh gayā hai is qadar ab surḳh-rū hone kā shauq
log apne ḳhuun se jismoñ ko tar karne lage

charbī mil kar insānoñ kī ik chehra daraḳhshāñ hotā hai
ye eid ke jalve bante haiñ jab ḳhūn-e-ġharībāñ hotā hai

mai-e-kohna na sahī ḳhūn-e-tamannā hī sahī
ek paimāna mire sāmne laayā to gayā

ḳhūn-e-jigar shāmil hai merā is gulzār kī raunaq meñ
sehn-e-chaman se barg o shajar tak ek kahānī biich meñ hai

dāstān-e-jaur-e-behad ḳhuun se likhtā rahā
qatra qatra ashk-e-ġham kā be-karāñ bantā gayā