Tags-Khoon

ḳhuun ho jaatā hai jab sozish-e-pinhāñ se bhaḌaktā huā dil
tairne lagtā hai rag rag meñ lahū ho ke dhaḌaktā huā dil

jahāñ dil zabt-e-ġham se ḳhuun ho jaatā hai siina meñ
vahīñ kuchh ruuh ko bālīdgī mahsūs hotī hai

yahāñ ḳhayāl ke sotoñ se ḳhuun phūTegā
sarāb ke liye jañgeñ haiñ sārbānoñ meñ

apne hī ḳhuun se is tarah adāvat mat kar
zinda rahnā hai to sāñsoñ se baġhāvat mat kar

kuchh ḳhūn-e-vafā se kuchh hinā se
kyā rañg bahār ne liye haiñ

ḳhuun ke qatroñ ne tūfān uThā rakkhā hai
ab rag-o-pai meñ mujhe barf jamī dekhnā hai

ḳhuun ke āñsuoñ se hai zīnat-e-husn-e-dil 'jigar'
chāhiye dāġh-e-ishq bhī sīna-e-pāk-bāz meñ

surḳhī kī ḳhatt-e-shauq meñ hājat jahāñ huī
ḳhūn-e-jigar meñ nok Duboyā davāt kā

rakho nok-e-zabāñ par bhar ke uñglī ḳhuun se mere
ye mīThā hai ki kaḌvā Tuk to is kā zā.iqa chakhkho

ḳhuun se jab jalā diyā ek diyā bujhā huā
phir mujhe de diyā gayā ek diyā bujhā huā

aab to dete ho ḳhanjar ko magar ye soch lo
ḳhuun merā chāhiye us ko bujhāne ke liye

hai faqat parhez ye kah do marīz-e-ishq se
piine ko ḳhūn-e-jigar hai ġham hai khāne ke liye

ye sach hai 'chāñd' shagufta ġhazal jo kahnī ho
qalam ko ḳhūn-e-jigar meñ Dubonā paḌtā hai

lākhoñ kā lahū pī ke bhī be dard abhī tak
kyuuñ ḳhuun kī pyāsī hai ye talvār se pūchho

maiñ ne apne paañv meñ bhāgte ḳhuun ko
mahmez dī

majlis meñ ġham kī ai 'sirāj' ab vaqt aayā daur kā
gar ḳhūn-e-dil maujūd hai mai-nosh ho mai-nosh ho

vo ḳhuun āñkhoñ se ronā amal purānā hai
ab ashk bahte haiñ āñkhoñ kī khaal saath liye

paan meñ ye rañg kahāñ aap ne
aap mire ḳhuun kā da.avā kiyā

kaale sūraj kī ziyā se shahr andhā ho gayā
ḳhuun meñ ḳhushbū ugāne ke hunar chhīne ga.e

apne andar hañstā huuñ maiñ aur bahut sharmātā huuñ
ḳhuun bhī thūkā sach-much thūkā aur ye sab chālākī thī