Tags-Khoon

maiñ ḳhuun bahā kar bhī huā baaġh meñ rusvā
us gul ne magar kaam pasīne se nikālā

kab se raazī thā badan be-sar-o-sāmānī par
shab maiñ hairān huā ḳhuun kī tuġhyānī par

kisī ke sāmne is tarah surḳh-rū hogī
nigāh ḳhūn-e-tamannā se bā-vazū hogī

kal shab maiñ ne is taaza laash ko haath jo lagāyā thā
kal shab us laash ke ḳhuun kā surḳh qatra mire rūmāl par jo lagā thā

kahāñ aañsū ke qatre ḳhūn-e-dil se haiñ baham nikle
ye dil meñ jam.a the muddat se kuchh paikān-e-ġham nikle

shor-e-tūfān-e-havā hai be-amāñ sunte raho
band kūchoñ meñ ravāñ hai ḳhūn-e-jāñ sunte raho

fatvā diyā hai muftī-e-abr-e-bahār ne
tauba kā ḳhuun bāda-kashoñ ko halāl hai

jald-bāz armāñ tere dīdār ke
ḳhuun ho kar āñsuoñ meñ bah ga.e

ab ḳhuun ke sāgar kholeñge
insān ke jauhar kholeñge

ḳhuun apnā ho yā parāyā ho
nasl-e-ādam kā ḳhuun hai āḳhir

saada kāġhaz pe ḳhuun ke aañsū
ab use ḳhat meñ aur kyā likkhūñ

raushnī kā qaht hai par fikr-e-fardā kis liye
ḳhuun kī tanvīr se raushan siyah-ḳhāna karo

hijr meñ piitā huuñ ḳhūn-e-dil mai-e-gulgūñ kī rañg
daur-e-sāġhar jāntā huuñ gardish-e-aflāk ko

apnī ġhazal ko ḳhuun kā sailāb le gayā
āñkheñ rahīñ khulī kī khulī ḳhvāb le gayā

chamak rahe haiñ mire ḳhema-e-suḳhan har-sū
harīf dekhiye shab-ḳhūn kaise mārte haiñ

ham ne har tarah se dil-e-ḳhūn kiyā hai apnā
ātish-e-mai se kabhī jurm-e-vafā se khele

ḳhūn-e-dil sarf kar rahā huuñ 'ravish'
ḳhuub se naqsh-e-ḳhūb-tar ke liye

ham gunahgāroñ ke kyā ḳhuun kā phīkā thā rañg
mehñdī kis vāste hāthoñ pe rachā.ī pyāre

kisht-e-muslim ko hamesha ḳhuun se sīñchā gayā
ek din hogī yahī khetī harī mātam na kar

karegī apne hāthoñ aaj apnā ḳhuun mashshāta
bahut rach-rach ke talvoñ meñ tire mehñdī lagātī hai