Tags-Khoon

ta.amīr meñ aatī hai nazar ḳhuun kī laalī
logoñ ne kise ḳhvāb kā me.amār kiyā hai

jis pe mere ḳhuun kī vāzeh shahādat naqsh thī
mere qātil kī vo sābit āstīñ bhī phaT ga.ī

tumhīñ se 'sābir' huī hai kotāhī tīrgī kī muhāfizat meñ
sunā nahīñ thā kabhī ye pahle ki jugnū shab-ḳhūn mārte haiñ

hamāre ḳhuun meñ bhī koī bichhḌī lahar aa.ī
havā ke haath meñ ik saaz honā chāhiye thā

ḳhūn-e-hasrat kah rahā hai dāstān-e-lucknow
rah gayā hai ab yahī rañgīñ-bayān-e-lucknow

munjamid ḳhuun ragoñ kā hai ise pī jaa.eñ
raat kā zaḳhm-e-siyah-rañg jigar-chāk to ho

ḳhūn-e-jigar se ātish-e-sozāñ ko shah milī
ḳhud dard ban ke rah gayā darmāñ kabhī kabhī

tere hoñToñ ke ta.iiñ paan se laal
dekh kar ḳhūn-e-jigar khātā huuñ

ḳhūn-e-dil jin kī gavāhī meñ huā nazr-e-vafā
rañg to vo uḌ ga.e ab kyā karūñ tasvīr kā

vo kab kā bah gayā sab ḳhuun ho kar
lagā.egā koī dil kā patā kyā

ḳhuun rone ke sivā kuchh nahīñ baaqī in meñ
kaise āsūda-e-ḳhanjar huiiñ āñkheñ merī

vo un kā chupke chupke muskurānā ḳhuun rone par
vo merā dil hī dil meñ vāsif-e-rañg-e-asar honā

ḳhuun jaltā rahtā hai gaañv ke javānoñ kā
kār-ḳhāne shahroñ ke kab dhuāñ ugalte haiñ

tire dāman se badlā leñge zālim ḳhūn-e-nāhaq kā
vo favvāre lahū ke jo mirī gardan se nikleñge

aah nikle na kab talak āḳhir
ḳhuun hotā rahe jigar kab tak

muttasil tū jo mirā ḳhūn-e-jigar piitā hai
kyuuñ ġham-e-ishq ye kyā tujh ko mazedār lagā

kuchh log jhāñkne lage dīvār-e-shahr se
kuchh log apne ḳhuun ke andar simaT ga.e

ḳhuun mazdūr kā miltā jo na ta.amīroñ meñ
na havelī na mahal aur na koī ghar hotā

jā-e-roġhan diyā kare hai ishq
ḳhūn-e-bulbul charāġh meñ gul ke