Tags-Khoon

raas aa sakī sukūñ ko nā tadbīr-e-zabt-e-ġham
ā.ankhoñ se ḳhuun dil kā ubaltā chalā gayā

rañgoñ se na rakhiye kisī sūrat kī tavaqqo
vo ḳhuun kā qatra hai jo shahkār banegā

us kī begāna-ravī se use samjhā maiñ ne
tishnā-e-ḳhūn-e-vafā thā karam-e-āsār na thā

āñsuoñ se ḳhuun ke ajzā badalte jā.eñge
dil ke sab armān āñkhoñ se nikalte jā.eñge

muddat huī hai ḳhūn-e-tamannā kiye magar
ab tak Tapak rahā hai lahū dil ke jaam se

go chūne-kārī meñ hotī hai surḳhī to aisī
kisī ke ḳhuun kā ye hai nishān koThe par

ḳhuun ke rishte ḳhuun meñ Duube ek zamīñ ke TukḌe par
sadiyoñ kā apnā-pan bhūle ham kitnī āsānī se

tahrīk jab jumūd ke sāñche meñ Dhal ga.ī
aisā lagā ki ḳhuun ragoñ meñ Thahar gayā

mire dil ke ḳhuun kī misl thā tujhe yaad hai mire dilrubā
koī rañg rañg-e-hinā bhī thā tire naqsh-hā-e-jamāl meñ

bārhā ḳhuun kar liyā dil ko
us ke hoñToñ kī ik hañsī ke liye

tum se kahtā huuñ mirā ḳhuun mire dil pe sahī
rasm-e-duniyā hai ki apnoñ se gilā hotā hai

shohdā ne.mat-e-duniyā kī talab bhuul ga.e
ḳhuun ke ghūñT meñ aisā hī mazā hotā hai

kabhī to dard kā sho.ala zabān par bhaḌke
dahaktā ḳhuun ragoñ ke azaab se nikle

kuchh tū hī apne ḳhūn-e-ramīda kī le ḳhabar
palkoñ pe qatra qatra Tapakne lagī hai shaam

maiñ ne junūñ se kī jo 'asad' iltimās-e-rañg
ḳhūn-e-jigar meñ ek hī ġhota diyā mujhe

ḳhuun ho jaa.eñ ḳhaak meñ mil jaa.eñ
hazrat-e-dil se kuchh ba.iid nahīñ

hamāre jaam meñ mai bhī hai ḳhūn-e-dil bhī hai
ye dekhnā hai ḳhudā vaale kyā harām kareñ

basān-e-ḳhūn-e-dil chaspāñ huī hai tere talvoñ se
hamārī dushman-e-jāñ ab ye shoḳhī-e-ziyā Thahrī

laḳht-e-dil khāne ko hai ḳhūn-e-jigar piine ko hai
mezbān-e-dahr ne kī ḳhuub mehmānī mirī

shauq-e-behad ne kisī gaam Thaharne na diyā
varna kis gaam mirā ḳhūn-e-tamannā na huā